1. Soal: Yurttiki tordashlar chet ellerdiki Uyghur ziyaliylirining turmushigha alahide qiziqidiken, özingiz we aile ehwalingiz toghrisida sözlep bersingiz?

Jawab: Bizning ailide 4 jan kishi bar: Ular men, ayalim Aman'gül, 1985-yili tughulghan qizim Dilnare we 1989-yili tughulghan oghlum Dilshattin ibaret. Bizning hazirqi öyimiz Kaliforniye shitatining Los Angeles shehirige 40km kélidighan Santa Clarita dégen sheherde bolup, Dilnaredin bashqilar mushu yerde turimiz. Dilnare San Francisco shehirige 30km kélidighan "Hayward" dégen sheherdiki Kaliforniye Shitat Univérsitétida iqtisad kespi bakalawrliqining 2-yilliqida oquydu. San Francisco bilen Los Angeles shehirining ariliqi 500km kélidu.

Men xizmet qilidighan idare öydin 53km yiraqliqtiki Pasadena dégen sheherge jaylashqan. Men her küni etigen saet 5 tin 45 minut ötkende (5:45 de) ornumdin turimen. saet 6:15 de öydin yolgha chiqip, 5km yiraqliqtiki bir yighilish ornigha barimen. U yerde idarining kichik aptobusigha chiqip, saet 6:30 de idarige qarap mangimiz. Bu 14 kishilik aptobus bolup, idarige saet 7:15 - 7:30 de yétip kélip, derhal ishqa chüshüp kétimiz. Chüsh waqti saet 12 de bir saet dem élish waqtimiz bar bolup, men tamiqimni ishxanamda yeymen. Her küni chüshlük tamiqimni alghach kélip, uni 15 minut ichide yep bolimen. Éship qalghan waqitta, manga kelgen e-mail xetlirini körüp, ulargha jawab yazimen. Kechte saet 4:25 de idaridin öyge qarap yolgha chiqimiz. Hemde saet 5:00 - 5:15 de öyge yétip bérip bolimen. Tamaq étip yep, öyde yene 1 - 1.5 saet ishleymen. Köpinche waqitlarda Uyghurlarning ishini, bezide idarining ishinimu qilimen. Téléwizordin azraq hewer körüp, kariwatqa saet 9:30 chiqip, shu künlük gézitning memliket we xelq'ara xewirini we Iqtisad qismini tepsiliy körüp, saet 10:30 uxlaymen.

Ayalim Aman'gülmu Pasadena shehiridiki bir chong doxturhanida kompyutér programmisi yézish we analiz qilish ishini ishleydu. Ishleydighan idarisi öydin 60km yiraqta bolup, özi mashina heydep baridu. Öydin saet 7:00 etrapida yolgha chiqip, saet 8:00 etrapida idarisige yétip baridu. Kechte saet 5:00 de yolgha chiqip, 6:00 etrapida öyge yétip kélidu.

Oghlum Dilshatning mektipi öydin 8km yiraqliqta bolup, mektepke balisi oxshash mektepte oquydighan bir qoshnimizning mashinisida baridu. Biz u qoshnimizgha her ayda 50 dollar pul töleymiz. Öydin saet 7:00 de yolgha chiqip, chüshtin kéyin saet 4:00 lerde öyge qaytip kélidu. Aldi bilen hemme tapshuruqlirini ishlep tügitip, bir téléwizor körüp, kech saet 10 larda uxlaydu. Dilshat bu yil 4-ayda mashina kénishkisi alidu. Shuningdin kéyin mektepke özi mashina heydep baridu.

Esli menbesi: www.biliwal.com