Qedirlik Uyghur Inim/Singlim:

Tor bétimni ziyaret qilghiningizgha köp rehmet.  Bu yerni ziyaret qilghiningiz sizning chet elde oqush arzuyingiz barliqidin dérek béridu. Biz Uyghurlarning bir parlaq istiqbali bolushi üchün, xelqimiz köp sandiki sizdek shijaetlik yashlargha muhtaj. Sirtqi dunyagha Uyghur Rayoni we Uyghur millitining mewjutluqini bildürüsh üchün, biz nurghunlighan aliy derijilik terbiye körgen, xelq’aradiki her xil sehnilerde riqabetlisheleydighan kishilerge muhtaj. Men sizning arzuyingizgha yetkiche toxtimay tirishchanliq körsitishingizni ümid qilimen..

Men ösüp yétilish jeryanidiki emeliy tejribilirimni yekünlep, muweppeqiyet qazinishning mundaq bir formulasini tüzüp chiqtim:

Muweppeqiyet = Talant + Tirishchanliq + Purset

Talant. Talantingizning bir qismi tughma bolidu. Qalghan qismi sizning kéyinki hayatingiz jeryanida rawajlinip yétilidu. Sizning chet elde oqush arzuyingizning barliqi, bashlan’ghuch mektep, ottura mektep, hetta aliy mekteptimu xéli yaxshi oqughanliqingizni körsitidu.  Bu sizning buningdin kéyinki hayatingizda choqum muweppeqiyetlik bolalighidek talant bilen tughulghanliqingizdin dérek béridu.  Emdi talantning qalghan qismigha kelsek, uning mundaq 3 qismi bolidu: 1. Yiraqni köreleydighan eqil-paraset, 2. Bilim, . 3. Tallighan yolida muweppeqiyet qazan’ghiche boshashmay mangalaydighan qabiliyet.  Siz özingizning éhtiyaji we uni öz iqtidaringiz bilen emelge ashurghili bolidighan-bolmaydighanliqigha qarap, özingizning tirishish nishanisini turghuzushingiz kérek.  Heqiqiy we keng dairilik bilim igilep, özingizning  alahide talantlirini bayqap, ashu talantliringizni rawajlandurush üchün qilche boshashmastin tirishishingiz kérek.

Tirishchanliq. Tirishchanliq her bir muweppeqiyette kem bolsa bolmaydighan nerse. Emma tirishchanliqni emeliyette ünümlük usul bilen körsitish anche asan ish emes.  Bezi kishiler her küni 16 saettin köprek waqitni ishleshke serp qilsila choqum öz nishanigha yételeydu, dep oylaydu.  Heqiqetenmu, waqitni minut bilen hésablaydighan kishilerning waqti, uni saet boyiche hésablaydighan kishilerge qarighanda 60 hesse köp bolidu. Gerche her küni öginish yaki xizmet üchün yéterlik waqit serp qilish we özining waqtidin ünümlük paydilinish tirishchanliqning muhim terepliridin ibaret bolsimu,  biraq u kupaye emes.  Waqitning ötüshi bilen tirishchanliqtin netije yaritish usulgha nisbeten toghra chüshenche bolushni, özining shexsiy prinsip we tüzümi bolushini we köp izdinishni telep qilidu.  Siz xataliqingniz we béshingizdin kechürgen issiq-soghuqtin tejribe yekünlep turushingiz kérek. Her küni kech bolghanda özingizdin: "Men bügün némini qolgha keltürdüm, némige érishtim?" dep sorashni özingizge adet qiliwélishingiz kérek. Shu arqiliq özingizge nejite béridighan ünümlük usulni tépip chiqishingiz kérek.  Tirishchanliq toghra usul bilen birikkendila andin közligen ünümge élip baridu.  Hergiz yaxshi ishlarni özlükidin kélidu, dep oylimang. Rawrus pilandin birni tüzüp, pilan tüzülgen kündin bashlap pilaningizni emelge ashurush yolida ish bashlang. Pilaningiz qanchilik emgek, qanchilik tirishchanliq telep qilidighanliqini hemde u ashunchilik tirishchanliqqa erzimdu-yoq, bularni obdan mölcherleng. Eger erzise, derhal ishqa kirishing. Bu yolda hergiz bir künnimu israp qilip ötküzüwetmeng. Buni özingizning kündilik aditi qiliweling.

Purset. Purset teleynimu öz ichige alidu. Kishiler purset bilen teleyning aldida barawer bolmaydu. Bolupmu milliy kemsitishni men'i qilish qanuni bolmighan dölette kishiler érishidighan pursetning derijisimu ademge qarap oxshash bolmaydu.  Adem pursetni yaritalaydu.  Siz özingizning talanti bilen tirishchanliqigha tayinip özingiz üchün purset yaritishingiz kérek. Bu yuqiriqidek bir dölette yashawatqan kishiler üchün téximu shundaq.  Eger siz özingizning pursetke érishelmigenlikingizni siyasiy sistémigha we bashqilargha dönggisingiz uning siz üchün hech qandaq emeliy qimmiti bolmaydu. Bashqigha dönggesh mesilingizni hel qilip bermeydu.  Sizde bir igiz taghqa uchrighanda uni yötkiwétidighan, bir chongqur azghalgha duch kelgende uni tinduruwétidighan gheyret we shijaet bolushi kérek. Pursetke érishtüridighan we sizni nishaningizgha yetküzidighan tüptüz, asan yol yoq. Siz özingizge purset yaritip, shu arqiliq öz nishaningizgha yétip barghiche toxtimay tirishchanliq körsitishingiz kérek.  Méning bir tonushum Béyjingdiki Amérika Elchixanisigha 2 yilning ichide 8 qétim bérip, axiri Amérikigha kélish wizisini aldi. Eger siz tiriship baqmisingiz, hemde dawamliq tirishmisingiz, birer muweppeqiyetni qolgha keltürüsh éhtimalliqingiz nöl bolidu.

Men bu tor bétidiki uchurlarning sizge yardimi bolushini tolimu ümid qilimen. Eger siz birer kesipte magesterliq yaki dokturluq oqushigha kirish yoli bilen chet'elge  chiqmaqchi bolup, bu ishta meslihetke muhtaj bolsingiz, men kuchumning yetishiche sizge meslihet berimen. Buning uchun töwendiki Él-xet adrési boyiche men bilen alaqilishing:

erkinsidiq @ gmail.com

Chet'elge chiqishta, birer kesipning Magéstérliq yaki Dokturluq oqushigha kirishtin bashqa, yene til öginish, sayahet qilish we tuqqan yoqlash qatarliq yollirimu bar. Méning xizmet wezipemning éghirlighi, her künni 10 nechche saet ishlimisem bolmighanlighi, waqtimning intayin qislighi sewebidin, men til öginish, sayahet qilish we tuqqan yoqlash yolliri bilen chet'elge chiqmaqchi bolghan wetendashlargha yardem qilalmaymen. Mushundaq yollar bilen chet'elge chiqmaqchi bolup, yardemge éhtiyajliq bolup qalghan wetendashlarning "Uyghur Yahoo Guruppisi" gha eza bolup kirip, shu guruppidiki wetendashlargha él-xet yézip, shu arqiliq yardemge érishishini tewisiye qilimen. Bu guruppining pütün dunyada ezaliri bar. Wetendinmu hem shundaq. Uning tör bet adrisi bilen él-xet adrisi töwendikidek:

Él-xet Adrisi:              uygurlar@yahoogroups.com

Tor bet adrisi:             http://groups.yahoo.com/group/uygurlar/

Mushu tor betining "Uyghur Scholars Directory" digen sahipiside chet eldiki bir qisim Uyghurlarning ismi, kespi, we alaqilishish e-mail adrisi bar. Bezilirining qisqiche terjimalimu bar.  Siz bezi ishlar toghrisida ulardin meslihet sorisingizmu bolidu.

Sizning muweppeqiyet qazinishingizgha chin könglümdin tilekdashliq bildürimen.

Erkin Sidick
Amérikining Kalifornia Shitatidin