Erkin Sidiq: Bowaqni Kéchisi Ozuqlandurush Zörürmu?

Bowaqni Kéchisi Ozuqlandurush Zörürmu?

Erkin Sidiq

2014-yili 8-ayning 8-küni

Kona yéziq nusxisi

http://bbs.izdinix.com/thread-59391-1-1.html

[PDF Nusxisi]

Yéqinda bir qérindishimiz manga torda inkas yézip, mendin mundaq bir so’al üstide izdinip béqishni ötünüptu: Bowaqni kéchisi ozuqlandurush zörürmu? Men bu mesile üstide izdinip, bezi qimmetlik uchurlargha érishtim. Töwende men shu uchurlarni qisqiche tonushturup ötimen.

In’glizche «Bowaqlar Merkizi» (Babycenter.com) dep atilidighan bir tor bet bar bolup, u tor bet hamilidar bolghan, yéngidin ana bolghan chokan we anilar üchün mulazimet qilidiken. Uning hazir 39 milyon ezasi bar bolup, Amérikidiki 70 pirsent hamilidar bolghan, yéngidin ana bolghan chokan we anilar ashu merkezning mulazimitidin paydilinidiken. Ularning tehrir bölümi töwendiki uchurni özining tor bétige chiqirip qoyuptu [1]:

Normal tughulghan balilar 6 ayliq bolghandin kéyin, ularni kéchisi ozuqlandurmisimu bolidu. Amérikining Néwada Shtati Réno shehiridiki balilar késili doxturi Suzan Sorinsén (Susan E.C. Sorensen) ning chüshendürüshiche, 6 aygha toshqan bowaqlar bir qétim ozuqlinip bolghandin kéyin, yene bir qétim ozuqlan’ghuche 6 sa’et waqit oyghinip ketmey, rahet uxliyalaydiken.

Siz kéchisi qopup balingizni ozuqlandurushni éghir körmigen teqdirdimu, eng yaxshisi balingiz 6 ayliq bolghandin kéyin balingizni kéchisi ozuqlandurmang.

Suzanning qarishiche, balingiz 2 ayliq bolghandin kéyinla uni özi uxlaydighan qilsingiz boluwéridu. Yeni bala 2 ayliq bolghandin kéyin, balingizning uyqusi kélip, téxi uxlimighan waqittila uni yatquzup qoyup, uni özi uxlaydighan qilishning héch qandaq ziyini yoq. Ikki ayliq balini kéchisi ozuqlandurmisa bolmaydu. Emma, balini özi uxlaydighan qilish arqiliq uning ozuqlinish herikiti bilen uyqugha kirish herikitini ayriwetkili bolidu. Yeni siz her qétim balingizni uxlitish üchün uni émitmisingizmu bolidu. Shundaqla balingiz kéchisi oyghinip ketken teqdirdimu, uni qayta uxlitish üchün uni émitmisingizmu bolidu.

Balingiz kéchisi ozuqlanmisimu bolidighan bolghanda, uningda mundaq alametler körülidu: Sizni bek uzun émip ketmeydu, qutidiki sütni ichip tügetmeydu, hemde sizni émiwétip uxlap qalidu.

Eger balingiz et alalmighan bolsa, yaki uningda bashqa normalsizliq körülüwatqan bolsa, kéchisi ozuqlandurush ishini qandaq qilish toghrisida siz choqum doxturdin meslihet éling.

Uyqu mutexessislirining neziride, bir bowaqning axshimi oyghanmay 5 sa’et uxlighini, uning pütün bir axshamni oyghanmay ötküzgenliki bolup hésablinidu [2].

Qoshumche: Turmushning 18 Qa’idiliri (Hékmetlik Sözler)

Amérikida bir dangliq güzel exlaq teshebbuskari bar bolup, uning ismi Maykul Joséfson (Michael Josephson). U dawamliq «Exlaq intayin muhim» (Character counts) dégen témida qisqa maqalilerni yazidu. Hemde mektep we hökümet organliri qatarliq nurghun jaylargha bérip, exlaq heqqide léksiye sözleydu. Men uning yazghanlirini nahayiti yaqturup oquymen. 2014-yili 29-Iyul küni u özining tor bétide «Turmushning 18 qa’idiliri» (18 random rules of life) dégen bir tizimlikni chiqirip qoydi. Gerche bu qa’idiler mezkur maqale bilen biwasite munasiwetlik bolmisimu, men qérindashlarning paydilinishi üchün, uning yazghinini Uyghurchigha terjime qilip, bu yerge qoshup qoydum. Men eskertip qoymisam bolmaydighan bir ish shuki, Amérika jem’iyiti bilen Uyghurlar yashawatqan jem’iyette zor perqler bar, shunga bu hékmetlik sözlerdin janliq paydilining.

Töwendikisi Maykul Joséfsonning yazghini [3]:

Men dunyawi hékmetlik sözlerni intayin yaxshi körimen. Ularni toplaymen, yézip qoyimen, hemde ularni bashqilar bilen hembehriman bolushni intayin yaxshi körimen. Töwendikisi turmushning 18 qa’idisi bolup, ular sizning öyingizdiki eynikingizge chaplap qoyushqa erziydu. Eger ularni kechlik tamaq waqtidiki a’ile muzakirisining bashlinish témisi qilsingiz téximu yaxshi bolidu.

1. Her qétim meghlubiyetke uchrighanda, uning tejribe-sawaqlirini yekünleng. Shundaq qilsingiz buningdin kéyin meghlup bolmaysiz.

2. Özingizning bir ishni toghra qilghanliqingizgha bolghan qayilliqingizning küchiyishi hergizmu sizning ashu ishni toghra qilghanliqingizning éhtimalliqini östürmeydu.

3. Heqiqiy dostingiz sizning özingizge nisbeten «men bir yaramliq adem» dégen héssiyatqa kélishingizge yardem qilidu, hemde sizni téximu yaxshiraq bolushqa intildüridu.

4. Eger siz bir orekning ichige kirip qalghan bolsingiz, uni kolawérishni toxtiting.

5. Netijige érishish bilen köngül échishni, hemde xushalliq bilen bextni arilashturup qoymang.

6. Özini qizghanchuqluqtin yiraq tutushni ret qilish özini erkinlikke érishtüridighan achquchni ret qilish bilen oxshash.

7. Bir ademge öch bolush öch körgen kishige qarighanda özini bekrek azablaydu.

8. Teleyge tayinish birdem bar bolup, birdem yoq bolidighan pursetke tayinishtur. Eger siz pilan tüzüp qattiq tirishsingiz, sizning ghelibe qilish éhtimalliqingiz zor derijide yuqiri kötürülidu.

9. Bashqilargha yéqinliq qilish özini bashqilardin üstün qoyushtin yaxshi.

10. Bir ishni bashqa élip chiqimighiche toxtap qalmasliqning qudritini töwen chaghlimang.

11. Eng addiy usul köpinche waqitta eng yaxshi usul bolup chiqmaydu.

12. Bashqilarning maghzipini étilduruwétish özingizningkini étilduruwétishtin köp asan.

13. Siz aghriqtin saqlinalmaysiz, emma derd chékishtin saqlinalaysiz.

14. Özige ich aghritish yéngilishqa élip baridighan istratégiye. U bashqilarni seskendüridu, hemde özingizni ajizlashturidu.

15. Qisqiraq yol köpinche waqitta kemtükrek ghelibige élip baridu.

16. Özingizning pozitsiyisini kontrol qiling. Bolmisa u sizni kontrol qilidu.

17. Ehmiyetlik bolush muweppeqiyetlik bolushtin muhimraq.

18. Dunya sizning saqaytishingizni kütüp turuwatidu.

Bu maqalini héchkimdin sorimay, menbesini bergen asasta bashqa her qandaq torgha chiqarsingiz, yaki élkitabqa oxshash bashqa her qandaq shekilde ishletsingiz boluwéridu. Bu maqale barliq uyghurlargha mensup.

Paydilinish matériyalliri:

[1] When can my baby go through the night without a feeding?

http://www.babycenter.com/408_when-can-my-baby-go-through-the-night-without-a-feeding_1368537.bc

[2] 10 Tips for Night Feedings

http://www.askdrsears.com/topics/feeding-eating/feeding-infants-toddlers/10-tips-night-feedings

[3] Eighteen Random Rules of Life

http://whatwillmatter.com/2013/07/commentary-836-2-eighteen-random-life-rules/

Bala Terbiyisige A’it Uyghurche Tor Betler:

http://www.aybalam.com

http://anabala.com/

http://www.parzant.com/
http://www.ewlat.net/

Bala terbiyisi buyumliri bilen teminleydighan shirketler: