Ghayini Ré'alliqqa Aylandurushning Sirliq Qanuniyiti (1)
 
Erkin Sidiq

2010-yili 10-ayning 18-küni

[1-Bölüm]  [2-Bölüm]  [3-Bölüm]   [4-Bölüm]   [5-Bölüm]   [6-Bölüm]   [7-Bölüm]   [8-Bölüm]   [9-Bölüm]


Kona Yéziq: [meripet.com]  [PDF] [uyghuracademy.org]   [bbs.bilik.biz]  [meripet.org]

Men yéqinda «Napoliyon Xilning chüshendürüshidiki özige tartishning sirliq qanuniyiti» dégen bir In’glizche kitabni oqudum.  Bu kitabning In’glizche atilishi «The secret law of attraction as explained by Napoleon Hill» bolup, uningda «özige tartish qanuniyiti» dep atilidighan bir qanuniyet, yeni insanlar özi isteydighan nersilerni qandaq qilip özige tartip ekilip, shu arqiliq öz ghayisini ré’alliqqa aylanduralaydighanliqi tepsiliy bayan qilin’ghan.  Töwende men bu kitabning ismini qisqartip, «Napoliyonning kitabi» depla ataymen.  Bu kitabta déyilishiche, yéqinqi zamanda keng taralghan medeniyetke eng zor derijide tesir körsetken nersilerning biri ashu qanuniyet bolup, qedimdin tartip taki hazirqi zaman’ghiche ötken mesh’hur ademlerning hemmisi ghayini ré’alliqqa aylandurushning bu «siri» ni bilidighan bolsimu, ular bashqilardin qizghinip, bu sirni ashkarilimay qoghdap kelgen iken.
 
Men mezkur maqalide, ashu kitabta bayan qilin’ghan «özige tartish qanuniyiti» ni tonushturup ötimen.  Bu qanuniyet ghayini ré’alliqqa aylandurush toghrisida bolghachqa, men u qanuniyet bilen « ghayini ré’alliqqa aylandurush qanuniyiti» ni oxshash menide ishlitimen. Bu kitabta jemi 200 bet, 11 bap bar bolup, uningdiki «özige tartish qanuniyiti» jemi 16 qanuniyetni öz ichige alidiken.  Shundaq turuqluq néme üchün Napoliyon bu qanuniyetning ismigha «qanuniyetliri» dégen köp sanliqni ipadileydighan sözni ishletmey, «qanuniyiti» dégen birla nersini ipadileydighan yalghuz sanliq sözni ishletkenliki ayding emes.  Méning perizimche, buning sewebi ashu 16 qanuniyetlerning hemmisi « ghayini ré’alliqqa aylandurush qanuniyiti» din ibaret birla qanuniyet üchün xizmet qilidighanliqi, yaki ular öz-ara chemberchas baghlan’ghanliqi üchün bolishi mumkin.  Shunglashqa men oqurmenlerdin mezkur maqalida tonushturulidighan qanuniyetlerning hemmisini «ghayini ré’alliqqa aylandurush qanuniyiti» tin ibaret birla asasiy mezmunning bir qismi, dep chüshinishini ümid qilimen.  Men mezkur maqalida ashu 16 qanuniyetlerning hemmisini imkanqeder toluq tonushturushqa tirishimen. 
 
«Napoliyon Xilning chüshendürüshidiki özige tartishning sirliq qanuniyiti» dégen kitab 2008-yili neshir qilin’ghan bolup, u Napoliyon Xil 1928-yili yazghan 8 tomluq «Muweppeqiyet qanuniyiti» («Law of Success») dégen kitab bilen 1937-yili yazghan «Oylap bay bolush» («Think and Grow Rich») dégen 2 kitabqa asasen «Highroads Media» dégen neshir shirkiti teripidin tüzülgen.  Kitabning her bir babida yuqiridiki Napoliyonning ikki kitabidin eynen élin’ghan abzaslar bilen ularning arisigha neshir qilghuchilar kirgüzgen chüshendürüshler bar bolup, adem uni oqughanda, kitab mezmunining tüzilishi anche rawan emestek bir héssiyatqa kélidiken.  Shunglashqa men mezkur maqalide bu kitabtiki uqumlarni asasen eynen alghan asasta, mezmunini retlik qilishqa tirishimen.  Shundaqla men bu maqalini bir qanche qisimgha bölüp yézip püttürimen.
 
Bir kitabtiki mezmunlarni bir parche maqale arqiliq tonushturghanda, kitabtiki bir qisim mezmunlar jezmen chüshüp qalidu.  Shundaq bolghachqa, men In’glizche bilidighan qérindashlargha Napoliyonning eslidiki In’glizche kitabini bir qétim oqup chiqishni tewisiye qilimen.  Hemde wetendiki imkaniyiti bar qérindashlardin birsining mezkur kitabni Uyghurchigha terjime qilip, neshir qildurush yolida tiriship béqishini ümid qilimen.
 
Men özige tartish qanuniyitining qandaq meydan’gha kelgenlikini chüshinish, mezkur qanuniyetning özini toluq chüshinish üchün nahayiti zörür ikenlikini hés qildim. Shundaq bolghachqa men maqalining kéyinki bölümide mezkur qanuniyetning asasliq töhpikarlirini qisqiche tonushturup ötimen.
 
1. Bu Qanuniyetning Muhim Töhpikarliri
 
(1) Endru Karnigi (Andrew Carnegie, 1835 – 1919)
 
«Özige tartish qanuniyiti» ning bir kitab bolup yézilip chiqishigha asasiy türtke bolghan kishi Endru Karnigi din ibaret.  U bir Sanaetchi we saxawetchi bolup, u 1835-yili Shotlandiye (Scotland) de tughulghan. U 13 yashqa kirgende Amérikigha kelgen.  Hemde ösmürlük dewridin tartip, paxta zawut ishchisi, télégraf xewerchisi, télégraf xet urghuchisi, Pénnsilwaniye tömür-yol shirkiti bashliqining sékritari, shirketning Pénnsilwaniye shöhbisining bashliqi qatarliq xizmetlerni ötep baqqan.  U 1865-yili özining tömür-yollar üchün tömür köwrük yasaydighan shirkitini qurghan. Andin u shirketni töwendikilerge kéngeytken: Rélis, poyiz motori, tömür -polat zawuti, kömür kani (polat tawlashqa ishlitidighan kömürni teminlesh üchün), özining kömürini toshuydighan’gha ishlitidighan tömür yoli.  1899-yili Amérikidiki polatning 25% ni Karnigi ning shirkiti chiqarghan. Uning shirkiti kéyin Amérika Polat Zawuti dégen dunyadiki eng chong shirketlerning biri bolghan.  U yene kütüpxana qurghan, aliy mektep we chérkolar üchün pul bergen, nurghun fond jem’iyitini qurghan. Shu arqiliq kishilik hoquq, dunya ténchliqi, exlaq, toqunushning aldini élish, maarip, ilim-pen, we sen’et ishliri üchün töhpe qoshqan.
 
Endru Karnigi özining bir ömürlük emeliyiti arqiliq «özige tartish qanuniyiti» ni bayqighan bolup, u birsige bu qanuniyetni mukemmelleshtürüp élan qildurush arzusida yürgende, Napoliyon Xilni uchratqan.  Men oqughan kitabta «özige tartish qanuniyiti» ning ornida «Karnigining siri» dégen ibarimu köp qétim ishlitilgen.
 
(2) Napoliyon Xil (Napoleon Hill, 1883—1970)
 
Napoliyon Xil 1883-yili Amérika Wirginiya shitatidiki bir kichik taghliq kentte tughulghan bolup, u 9 yashqa kirgende apisi ölüp ketken.  U deslepte öz mehelliside bélige 6 tapancha ésip yürüydighan bir «palwan» bolup yürgen.  Uning nahayiti yoqiri sözlesh talanti bar bolup, 12 yashqa kirgende, uning ögey apisi Napoliyonni bir toghra yolgha bashlash meqsitide, uning tapanchilirini bir xet-urush mashinisigha tégishtürgen. Napoliyon 15 yashqa kirgende, yerlik gézitke hékaye chiqirip yürgidek bolghan.  U bir yil igilik bashqurush mektipide oqughan, hemde 19 yashqa kirgende bir kömür-kan shirkitide 350 ademni bashquridighan eng yash bashliq bolghan.  U Amérikining Gorgtawun Uniwérsitétide bir yil qanun oqup, 1907-yilighiche bir yaghachchiliq shirkitide ishligen. U shirket taqilip ketkendin kéyin, Napoliyon Washingtondiki bir muweppeqiyet hékayiliri arqiliq bashqilarni ilhamlandurushni asasiy mezmun qilghan jornalgha muxbir bolghan. Mushu muxbirliq xizmitige kirgendin kéyin, uning özi tallighan 1-wezipisi eyni dewrdiki dunyagha meshhur erbab Endru Karnigini ziyaret qilish bolghan. U Endru bilen söhbetlishish üchün bir Jüme küni etiginining 3 saetlik waqtini alghan bolup, söhbet bashlan’ghandin kéyin uning waqti arqa-arqidin uzirap, u jemi 3 kün dawam qilghan.  Yeni Napoliyon Endruning öyige Jüme küni etigini barghan bolup, uning öyidin kéyinki Düshenbe küni etigini qaytqan. 
 
Shu qétimqi söhbet jeryanida, Endru Napoliyon’gha özining bay bolush we muweppeqiyet qazinish pelsepisini tepsiliy sözlep bergen.  Hemde Napoliyonning 20 yildin artuq waqit serp qilip, eng dangliq kishilerning muweppeqiyet sirlirini tetqiq qilip, shu arqiliq «özige tartish qanuniyiti» ni mukemmelleshtürüp, u qanuniyetke özini toluq ishendürgendin kéyin, mezkur qanuniyet toghrisida adettiki ademlermu muweppeqiyetlik bolush üchün paydilinalaydighan emeliy usullarni teswirleydighan bir kitab yézip chiqirish wedisini alghan. Shuningdin kéyin Napoliyon bir tereptin özining muxbirliqini qilip, yene bir tereptin Karnigi projékti üstide tetqiqat élip barghan.  Endruning tonushturushi bilen Napoliyon eyni waqitta eng zor derijide muweppeqiyet qazan’ghan 100 din artuq sodigerler, sanaetchiler, keshpiyatchilar, alimlar, aptorlar, artislar we her xil sahelerning lidérliri, shundaqla 16 mingdin artuq adettiki xizmetchiler, shirket bashliqliri, we karxanichilar bilen körüshüp, ular bilen söhbet ötküzüp, ularning ish béjirish usulliri, uchrighan tesirliri, we xususiy turmushlirini üzül-késil tekshürüsh imkaniyitige érishken.  Bu kishiler Napoliyon’gha yene yéngi dangliq ademlerni tonushturghan bolup, ularmu Napoliyon’gha özlirining muweppeqiyet qazinish sirlirini sözlep bergen. Shu kishilerning qatarida dunyagha dangliq keshpiyatchi Tomas édison bilen Amérikidiki Ford mashina shirkitining qurghuchisi Ford qatarliq kishilermu bar bolup, Napoliyon yene bir qisim shirketler, hökümet dairiliri, siyasonlar we Amérikining prézidéntlirigha meslihetchimu bolghan.
 
Shu tetqiqatning netijiside, Napoliyon 1928-yili 8 tomluq «Muweppeqiyet qanuniyiti» («Law of success») dégen kitabni yézip élan qilghan.  Uningdin burun héch kim bundaq bir eser toplimini körüp baqmighan bolup, bu toplamning élan qilinishi eyni waqitta bir chong hadise bolup hésablinip, bu kitablar eyni zamandiki eng köp sétilghan kitablar qatarida orun alghan.  Uningdin kéyinki 9 yil ichide, Napoliyon kéyinki bir dewr kishiliri ichidiki tesir dairisi eng küchlük kishiler bilenmu körüshken, hemde eyni waqittiki Amérika prézidénti Franklin Röziwéltqa meslihetchi bolup ishligen.  1937-yiligha kelgiche uning biwaste söhbet ötküzgen kishilirining sani 25 ming’gha yetken bolup, ularning ichidiki 500 din artuq kishi shu waqittiki Amérika boyiche eng bay, tesir dairisi eng küchlük, pütün Amérika jem’iyitige yardimi tekken karxanichilar we lidérlerni öz ichige alghan.  Napoliyon özining tetqiqatini yéngilap we qaytidin retlep, 1937-yili «Oylap bay bolush» («Think and grow rich») dégen 2-kitabini yézip élan qilip, dunyagha yene bir qétim tonulghan.  Napoliyon 1970-yili wapat bolghan bolsimu, uning fond jem’iyiti (uning tor bet adrési mushu maqalining axirida bérildi) hazirmu mewjut bolup turmaqta.
 
Ilawe: Gherblikler nishanni ré’allashturush, ghayini emelge ashurush, we qiliwatqan ishini muweppeqiyetlik qilish toghrisidiki ilmiy nezeriyilerge intayin köngül bölidighan bolup, yuqirida tilgha alghinimdek Amérika prézidénti Franklin Röziwéltmu Napoliyon Xildek bir ademni özige meslihetchi qiliwalghan iken.  Uyghurlar hazirghiche bundaq ishlarda intayin ajiz bolup, men bilidighan ishlarning ichide semimiy meslihet béridighan bilimlik kishilerning küni, yaki uchrighan muamilisi, anche yaxshi bolmighan misallar intayin köp.  Shunglashqa men Uyghurlar ilmiy usulda ish qilishni nahayiti küchep öginishi kéreklikini izchil türde teshebbus qilip keldim.  Méning ashundaq teshebbuslirim ushbu témighimu nahayiti uyghun kélidu. 
 
(3) Yéngi Tepekkür Herkiti (1850-1930)
 
Napoliyonning eng yaxshi yilliri bilen Endruning bay we muweppeqiyetlik bolush derijisige kötürülüshi Amérikida élip bérilghan «Yéngi tepekkür herikiti» eng yoqiri pellige kötürülgen dewrge toghra kelgen.  Yéngi tepekkür herikiti «Ijabiy oylashning ijabiy özgirish élip kélishtiki küch-qudriti» dégen mezmun’gha merkezleshken bolup, u 1850-yilidin 1930-yilighiche dawam qilghan.  Bu heriketke nahayiti zor tesir körsetken kishilerning birsi Finis Kwimbi («Phineas Quimby ») din ibaret.  Finis Kwimbi rohiy küch bilen adem dawalaydighan dangliq doxtur bolup, u özining bashqilarni dawaliyalishi özining tesiri bilen emes, késellerning öz könglining küchi bilen bolghanliqini bayqighan.  Shuning bilen u «Tepekkür yaki xiyalning küchi ré'al dunyadiki emeliy özgirishni wujutqa keltüridu» dégen nezeriyini otturigha qoyghan bolup, bu nezeriye eyni waqittiki yéngi tepekkür herikitige nahayiti zor tesir körsetken.  Ashu heriket jeryanida, «Köngül ilmi», « Köngül arqiliq adem dawalash» qatarliq bir qisim yéngi ilimni teswirleydighan kitablar élan qilin’ghan bolup, u kitablarning bir qismini Kwimbi dawalap baqqan kishiler yazghan. Ashu heriketke qatnashqan yene bir qisim kishiler «özige tartish qanuniyiti» ning yalghuz salametlik jehettiki iqtidarila emes, bayliq we muweppeqiyet yaritishtiki iqtidarlirinimu tetqiq qilghan.  Bu uqum In’glizchide «Like attracts like» dep atilidighan bolup, u «köngülde saqlan’ghan ijabiy oy (yeni ijabiy xiyal, ijabiy idiye) ré'alliqtiki ijabiy netijilerni özige tartip kélidu» dégenni teshebbus qilghan.  Shu chaghda mushu «özige tartish qanuniyiti» toghrisida nechche yüz parche kitablar yézilghan bolup, ularning ichidiki eng dangliq kitab Napoliyon Xil ning «Oylap bay bolush» dégen kitabi bolghan.
 
Yéngi tepekkür herikitining asasiy eqidiliri töwendikilerdin ibaret bolghan (töwendiki eqidiler Napoliyonning kitabidin emes, intérnéttiki bashqa matériyallardin élindi):
Bu yerde eskertip qoyushqa tégishlik bir ish bar. U bolsimu, Napoliyonning kitabida «cheksiz eqil» dégen söz we uqum intayin köp ishlitilidighan bolup, kitabta bu söz hergizmu «Xuda» dégen menada ishlitilmigen.  Yeni, Andru Napoliyon bilen söhbetleshkende, «özige tartish qanuniyiti» toghrisida kitab yazghanda, hergizmu uni din’gha chétishliq qilip qoymasliqni nahayiti qattiq tapilighan iken.  Buning sewebi, dinning bir qanche xilliri bar bolup, her bir dindimu bir qanche mez’hepler bar.  Eger u qanuniyetni birer din’gha yaki Xudagha baghlap turup chüshendürgende, choqum bir qisim kishilerni xosh qilip, yene bir qisim kishilerni narazi qilidighan ish kélip chiqatti.  Andru bu qanuniyettin hemme adem paydilinidighan bir ehwalni wujutqa keltürüsh üchün, uni dindin yiraq tutqan.
 
Men yéqinda « Muweppeqiyetning menbesi» dégen bir maqalini oqudum (bu maqalining tor adrési mushu maqalining axirida bérildi).  Bu maqalining aptori yaki menbesi toghrisida uni chiqarghan tor bétide héch qandaq uchur bérilmigen bolup, manga u bir In’glizche kitabtin terjime qilin’ghan mezmundek tuyuldi.  Bu maqalida yuqirida bayan qilin’ghan, «Toghra tepekkür qilishning késelni dawalash ünümi bar» dégen eqidige ait mundaq bir mezmun bar iken: «Köp qisim kishiler tinichlandurush dersining tesirini bilidu. Eger siz birawgha melum bir xil dorini mundaq tesiri bar, dep bergen bolsingiz, emeliyette u dorining undaq tesiri bolmighan teqdirdimu, qarshi terep u doridin yenila ashu xil tesirni hés qilidu. Roman Kashinis késel dawalash jeryanida eqidining bu xil küch-qudritini biwasite hés qilip yetken. U mundaq deydu: Salametlikni eslige keltürüsh jeryanida, dora anche zörür emes, zörüri eqididur. Melum bireylen bir qisim késel kishilerge qarita tinichlandurush dorisi siniqi élip barghan. U bu késel kishilerni ikki guruppigha bölgen. Birinchi guruppidiki kishilerge ularning birxil yéngi dora ichidighanliqi we bu yéngi dorining ularning aghriqini choqum peseytidighanliqini uqturghan. Ikkinchi guruppidiki kishilerge bolsa ularning bir xil sinaq dorisi ichidighanliqi, bu dorining aghriqni peseyteleydighan yaki peseytelmeydighanliqining téxi naéniq ikenliki qatarliqlarni uqturghan. Netijide, birinchi guruppidiki kishilerning 57 pirsenti aghriq azabining roshen derijide yenggiligenlikini hés qilghan. Ikkinchi guruppida bolsa peqet 25 pirsent ademla shundaq hés qilghan. Emeliyette, bu ikki guruppa ademge ichürülgini qilche dawalash qimmiti yoq oxshash xil dora iken. Démek, bu yerdiki oxshashmasliq peqet eqididiki oxshashmasliqtinla ibaret bolghan xalas.  Yene bir misal alsaq, bir qisim kishilerge ziyanliq dora yigüzülgen, hem ulargha ularning buningdin bir xil paydiliq tesir hés qilidighanliqi uqturulghan. Netijide, ular derweqe héchqandaq ziyanliq tesirlerni hés qilmighan. Bu xil tejribini ishligen adem Andériy Wérning bildürüshiche, dora yégüchilerning hés – tuyghusi özliri ümid qilghandiki bilen tamamen dégüdek oxshash bolghan. U özining anqitam (79) yégen ademni éghir bésiq tuyghugha, bayit tuz kislatasi yégen ademni bolsa rohlan'ghan tuyghugha keltüreleydighanliqini bayqighan. U mundaq deydu: Dorining séhri küchi, qandaqtur dorining özide bolmastin belki dora istimal qilghuchining qelbididur.»
 
2. Arzu, Nishan we Ghaye
 
Men 2010-yili 8-ayda Istanbulda échilghan Uyghur Akadémiyisining 2-qétimliq ilmiy muhakime yighinida mezkur témida doklad bergende, doklatning témisini «Arzuni ré’alliqqa aylandurushning sirliq qanuniyiti» dep alghan idim.  Mezkur maqalining témisini bolsa «Ghayini ré’alliqqa aylandurushning sirliq qanuniyiti» dep aldim. Töwende bu heqte qisqiche chüshenche bérip ötimen.  Men mezkur maqalini teyyarlash üchün Napoliyonning kitabini qayta-qayta oqudum.  Netijide mundaq bir nersini hés qildim: Napoliyonning kitabida «arzuni ré’alliqqa aylandurush» dégen ibaride «arzular» dégen menini bildüridighan In’glizche söz «wishés» bilen «oy, xiyal, oy-pikir, idiye, tepekkür» dégen menilerni bildüridighan In’glizche söz «thoughts» ni ishletken.  Eger bu qanuniyetke méning «Nishan tikleshte bilishke tégishlik ishlar» dégen maqalemda bayan qilin’ghan arzu, nishan we ghayining éniqlimisi boyiche qaraydighan bolsaq, Napoliyonning kitabida közde tutqini «arzu» bolmastin, «ghaye» iken.  Mezkur maqalidiki mezmunlarni toghra we toluq hezim qilish üchün, aldi bilen arzu, nishan we ghayining néme ikenliki, hemde ularning öz-ara perqining néme ikenlikini biliwélish nahayitimu zörür.  Shundaq bolghachqa, méning «Nishan tikleshte bilishke tégishlik ishlar» dégen maqalini oqup baqmighan qérindashlar üchün yuqiridiki maqalidiki bu 3 uqum heqqidiki mezmunni bu yerge eynen köchürüp kirguzup qoydum.  U maqalini oqup baqqan qérindashlar bu bölümni oqumay, kéyinki bölümge ötüp ketse boliwéridu.
 
Men bu yerde yene bir nersini eskertip qoyushni muwapiq kördüm: Gerche mezkur maqale méning burunqi «nishan» we «ghaye» toghrisidiki ikki parche maqalem (eger bu maqalilerni téxi oqumighan bolsingiz, mezkur maqalining dawamini oqushtin burun ashu ikki parche maqalini choqum bir qétim oqup chiqing.  Ularning tor bet adrésliri mushu maqalining axirida bérildi) bilen zich munasiwetlik bolsimu, u ikki parche maqale mezkur maqalining ornini alalmaydu.  Yuqirida déginimdek, Napoliyonning dunyagha dangliq ikki parche kitabi 1928-yili bilen 1937-yili yézilghan. Méning hés qilishimche, 1940-yilliri we uningdin kéyin yézilghan nishan, ghaye, lidérliq, muweppeqiyet qatarliqlar toghrisidiki maqale-kitablarning köpünchisi Napoliyonning ashu ikki kitabidiki ilmiy nezeriyilerni asas qilghan bolup, men mezkur maqalida ashu ilmiy nezeriyilerning asasiy qismini qisqiche tonushturup chiqimen.  Shunglashqa men barliq qérindashlargha mezkur maqalinimu axirghiche bir qétim oqup chiqishni teshebbus qilimen.
 
Töwendikisi méning «nishan» toghrisidiki maqalemdin élin’ghan mezmun:
 
Arzu, ghaye we nishan dégen sözlerni hemmimiz nahayiti köp ishlitip yaki anglap turimiz.  Lékin bu uqumlar arisidiki perqni hemmeylenning bilip kétishi natayin.  Shundaq bolghachqa, men töwende ularning perqi üstide azraq toxtulup ötimen.
 
Arzu:  Arzu deginimiz siz éhtiyajliq bolghan, özingiz isteydighan, yaki bir küni ige bolishini ümid qilidighan, emma uni qolgha keltürüshke hazirche heqiqiy turde bel baghlimighan barliq nersilerni öz ichige alidu.  Arzularni tepip chiqish bir erkin tepekkür qilish jeryani bolup, bu jeryanda siz ularni qandaq we qachan emelge ashurush heqqide qilche oylanmisingizmu boliweridu.  Mesilen, méning qanat chiqirip uchqum bar, méning palani qiz bilen yaki puküni yigit bilen muhebbet baghlighim bar, méning 4 xil chet el tilini sözliyeleydighan bolghum bar, méning aliy mektepte oqughum bar, méning ming kishilik bir shirket qurghum bar, méning chet elge chiqip oqughum bar, méning millet teqdirini tuptin yaxshilighim bar, dégenlerning hemmisi arzularlar bolup, ularning bezilirini emelge ashurghili bolidu. Bezilirini bolsa emelge ashurghili bolmaydu.  Siz aldi bilen özingiz arzu qilidighan nersilerni bir qeghezge yézip tizip chiqip, andin ularni muhimliq derijisige ayrip, eng axirida ularning ichidiki qaysilirini emelge ashurush üchün tirishidighanliqingizni qarar qilsingiz bolidu.  Siz rastinla emelge ashurushni isteydighan bir arzuni tapqandin kéyin, uni özingizning ghayisi yaki nishanigha aylandurisingiz bolidu. 
 
Nishan: Nishan deginimiz qisqa muddet ichide yetmekchi bolghan, biwaste özingizning kontrolliqi astida turidighan, özingizning zéhin-küchini merkezleshturgen, mezmuni konkirit bolghan pellilerni körsitidu.  Nishanni toghra tikligende, u chong-chong netijilerni qolgha keltürüshning bir küchluk qorali bolalaydu.  Emma uni toghra tiklimigende, chong-chong netijilerni yaritishni cheklimilerge uchrutupmu qoyidu.  Yeni, eger siz kichik-kichik nishanlar ichige chokup ketsingiz, özingizning hayati we istiqbali heqqidiki chong resimlerni körelmey, chong yonilishni muwapiq kontrol qilalmay, we axirqi pellini toghra talliyalmay qalisiz.  Eng axirqi pelle yaki chong nishan bilen kichik-kichik nishanlar otturisidiki boshluqni toldurghuchi ghayedin ibarettur.  Men nishan heqqide ushbu maqalining kéyinki qismida yene mexsus toxtulimen.
 
Ghaye:  Ghaye diginimizmu bir xil pelle bolup, u sizning axirqi yaki eng chong ümidingiz yaki arzuyingizni toluq emelge ashuridighan pellidin ibarettur. Ghaye nishan’gha oxshash her xil cheklimilerge uchrimaydu.  U chong bolsimu, hemde deslepte emilyetke uyghun kelmeydighandek bilinsimu boliweridu.  Shundaqla u nishandek merkezleshken we konkirit bolmisimu boliweridu.  Bezi ghayiler sizning buningdin kéyinki 5 yildin 10 yilghiche bolghan hayatingiz bilen baghlan’ghan bolidu. Beziliri bolsa sizning bir pütün omringizge suzulghan bolidu.  Ghaye sizning eng axirqi menzilingiz, nishan bolsa ashu menzilge yétish üchün élip barghan sepiringizning arliqtiki toxtash nuqtiliridur.  Ghaye siz némini isteydighanliqingiz we uni némishqa isteydighanliqingizgha wekillik qilidu.  Nishanlar bolsa sizni ashu menzilge élip baridighan pilan’gha wekillik qilidu.   
 
 
3. Özige Tartish yaki Ghayini Ré’allashturush Qanuniyiti
 
Her bir insan özining xiyali yaki tepekkurini özi kontrol qilish tughma talantigha ige.  Eger siz könglingizde bir muhim xiyal yaki bir muhim arzuni turghuzup, uni könglingizde dawamliq saqlap tursingiz, sizning méngingiz ashu xiyal bilen «magnitlishidu».  Bashqichiraq qilip éytsaq, ademning yushurun éngi bir magnitqa oxshaydu.  Siz uni bir éniq meqset bilen qozghighan we teltöküs toyundurghan waqtingizda, u magnit ashu meqsetni emelge ashurush üchün zörür bolghan hemme nersilerni özige tartip ekilishke intilidu.  Mushu teriqide sizning magnitlashqan könglingiz sizge özingizning arzusigha mas kélidighan küch-qudret, adem we sharait qatarliqlarni tartip ekilip béridu.  Qisqartip éytsaq, siz öz zéhningizni merkezleshtürgen we könglingizde saqlighan bir idiye özige özi bilen oxshash mahiyettiki oy we idiyilerni tartip kélidu.  Eger sizning könglingizge pükkiningiz bir alahide nerse bolsa, umu özi bilen oxshash nersilerni özige tartip, oylighan nersingiz sizge heqiqiy dunyadiki ré’al nerse bolup kélidu.  Yuqiriqilar «özige tartish qanuniyiti» ning eng asasiy mezmunidur.
 
In’glizchide «Like attracts like» dégen bir ibare bar bolup, uning menisi «her bir nerse özige özi bilen oxshash nersilerni tartidu» din ibaret.  Dunyada buning misalliri intayin köp.  Mesilen, eger siz bir yerge bir tal bughday uruqini térip, uningdin 30 santimétir yiraqliqqa bir tal qonaq uruqini térisingiz, gerche ular oxshash bir yerdin ozuqlan’ghan bolsimu, bughday uruqidin bir tal bughday, qonaq uruqidin bir tal qonaq ösüp chiqidu.  Yeni, oxshash bir yerde tursimu, bughday özige özi bilen oxshash nersilerni tartip kélip, bughday bolup ösidu.  Qonaqmu hem shundaq qilidu.  Hergizmu bir tal bughday sapiqining bir shéxida bughday, yene bir shéxida bolsa arpa ösüp qalmaydu.  Yeni bu ösümlükler hergizmu xataliship qalmaydu.
 
Ilawe:  Eger siz özingiz bilidighan ademlerni obdan közitip baqsingiz, mundaq bir ishni bayqaysiz: Exmeq, semimiyetsiz, ichi qotur, iplas we rezil ademlerning etirapigha yene shu exmeq, semimiyetsiz, ichi qotur, iplas we rezil ademler toplan’ghan, yaki bolmisa ularning arilishidighan ademliri köpünche halda yene shu özi bilen oxshash xildiki ademler bolghan.  Adil, mert, yaxshi xisletlik, bilimlik we iqtidarliq ademlerning etirapigha bolsa oxshashla adil, mert, yaxshi xisletlik, bilimlik we iqtidarliq ademler toplan’ghan, yaki bolmisa ularning arilishidighan ademliri köpünche halda yene shu özliri bilen bir xildiki ademler bolghan.
 
Bu yerde her bir adem qet’iy este tutmisa bolmaydighan bir muhim ish bar.  U bolsimu, bu dunyada héchnime bermey turup, bir nersige érishidighan ish yoq.  Bir qisim nadan yaki gödek kishiler buni chüshenmey, «men bir nersini nahayiti qattiq arzu qiliwersem, yaki Xudadin tilewersem, men uning’gha bir küni choqum érisheleymen», dep oylaydu.  Melum bir nersige ölgüdek éhtiyajliq bolup qalghanda, menggü yüz bermeydighan ishqa ümid baghlap turup qalidu. 
 
Bir nersige arzu qilish yaki kéche-kündüz oylash arqiliqla érishkili bolamdu?  Andru Karnigi heqiqetenmu ashundaq nadanmu?  Napoliyon Xil ashundaq bir exmiqane ish üchün heqiqetenmu 30 yil waqitni israp qilghanmu?
 
Arzu qilghan nersining özligidin ré’alliqqa aylinishi bilen bir oyning bir ré’alliqning namayendisige aylinishi otturisida intayin zor perq bar.  Bir oy yaki arzu yéngidin wujutqa kelgen waqit bilen u eng axirida emelge ashqan waqitning ariliqida yüz bermise bolmaydighan bir talay ishlar bar (Mushu yerde méning «nishan» we «ghaye» toghrisidiki ikki parche maqalemni eslep béqing).  Bezi ademler bir nersini intayin qattiq arzu qilip, uninggha érishkende küni qaysi derijide yaxshi bolidighanliqi toghrisida toxtimay uxlimay chüsh köridu, yaki quruq xiyal qilidu.  Yene bezi ademler bolsa bir nersini intayin qattiq arzu qilip, qandaq qilghanda ashu nersige érisheleydighanliqi toghrisida toxtawsiz oylinidu we izdinidu.  Bu 2 xil ademler otturisida nahayiti zor perq bar. 
 
Hemme ademler öz hayatida nurghun pul, bir yaxshi xizmet orni, nam-shöhret we yoqiri inawet qatarliq yaxshi nersilerge érishishni arzu qilidu.  Emma, köpünche kishiler arzu qilish basquchining nérisigha ötelmeydu.  Öz hayatida érishmekchi bolghan nersilerni nahayiti éniq bilidighan, hemde ularni qolgha keltürüshke qet’iy irade baghlighan kishiler hergizmu arzu qilish basquchidila toxtap qalmaydu.  Ular öz arzulirini bir köyüp turghan istek derijisige kötürüp, u istekni emelge ashurush yolida bir mukemmel pilan tüzüp, shu pilan boyiche toxtawsiz tirishchanliq körsitidu.  Kishiler öz tirishchanliqi arqiliq érishken bayliq we maddiy nersilerning hemmisi desliwide özi isteydighan nerse toghrisidiki bir intayin éniq we ixcham köngül  menzirisi sheklide bashlinidu.  Bu köngül menzirisi chongayghanda, yaki u mejburi halda ademning pütün wujudini qapliwalghan bir xiyal derijisige kötürülgende, uning kontrolluqi ademning yoshurun éngigha ötüp kétidu.  Mana shu nuqtidin bashlap, adem ashu köngül  menzirisige maddiy jehettin ékwiwalént (tengdash) bolghan nersige tartilidu, jelb qilinidu, yaki yéteklinidu.
 
Siz isteydighan nerse pul yaki bir mashina bolsa, sizning ashu nersilerni köz aldingizgha keltürüshingiz bilenla hergizmu u pul yanchuqingizda peyda bolup qalmaydu, yaki u mashina ishikingizning aldigha kélip qalmaydu.  Siz nurghun pul, bir mashina, yaki bashqa bir maddiy nersige érishken waqittiki ehwalni köz aldingizgha keltürgende, sizning emeliyette qilghan ishingiz özingizning ashu ishni qilish qabiliyitingizning barliqidin ibaret bir eqidige özingizni ishendürüshtin ibaret bolidu.  Siz özingizning istiki toghrisidiki bir janliq tesewwurni wujutqa keltürgende, bu tesewwur sizning yoshurun éngingizgha qattiq ornap kétidu.  Andin u sizning yoshurun éngingizdiki bashqa uchurlar bilen baghlinidu, we ular öz-ara tesir körsitishidu.  Shuning bilen siz aptomatik halda yighip mashina alidighan pulni qandaq qolgha keltürüsh heqqide téximu köp we téximu yaxshiraq idiyilerni oylap chiqalaysiz.  Démek, istekning axirqi netijisini köz aldigha keltürüsh hergizmu konkrét nersilerni wujutqa keltürmeydu.  U peqet yéngi idiye we zörür pozitsiyelerni wujutqa keltüridu.  Siz shuning türtkisi bilen özingizning burunqi pozitsiyisi bilen idiyisini özgertkende, özingizning xiyali ichide yashash basquchidin emeliy ish qilish basquchigha ötisiz.  Andin sizning tesewwuringiz emes, siz özingiz heriket qollinip, konkrét ishlarni emelge ashurisiz.
 
Ilawe: Men «Ish ünümi yuqiri kishilerning 7 aditi» dégen maqalemde tonushturghan ikkinchi adet: «Öz könglide ishni uning axirsidin bashlash» bolup, bu adet yuqirida sözlen’gen, aldi bilen öz istikining köngül menzirisini wujutqa keltürüsh bilen pütünley oxshash. 

 
Bu yazmida tilgha élin'ghan eserlerning tor adrésliri:
 
Napoliyon Xil Fonda Jemiyiti:
http://www.naphill.org/
 
«Nishan tikleshte bilishke tégishlik ishlar»:
http://www.meripet.com/Sohbet1/2010a1_Goal.htm
 
«Ghaye tikleshning 10 ölchimi»:
http://www.meripet.com/Sohbet1/20100925_Ghaye.htm
 
«Ish ünümi yuqiri kishilerning 7 aditi»
http://www.meripet.com/Sohbet1/Erkinb8_7adet.htm
 
«Muweppeqiyetning menbesi»:
http://www.bilqut.com/kutupxana/show.php?itemid=1738

© Copyright 2004 Uyghur Meripet  Torbeti 

Cell Phone Accessories
Cell Phone Accessories