Ejdadimning Zémini Men Shertsiz Söygen Makan

Erkin Sidiq

2017-yili 12-Dikabir

Asiyaning kindiki qaldurghan köpni heyran,

Nechche ming yil yashighan uningda xelqim aman.

Xojayin bop ötken hem, hörlükte sürüp dewran,

Atamiras tupraq u, men shertsiz söygen makan.

Cheksiz ketken u yerde tash, qumluq we sayliq bar,

Shu qum-sayliq astida su, qashtash we bayliq bar.

Bipayandur yayliqi, kanliri köp taghliq bar,

Ejdadimning zémini men shertsiz söygen makan.

Bekmu munbet tupriqi, oxshaydu köktat-ashliq,

Baghqa tolghan hemme yer, yémishler temlik, tatliq.

Xelqim xoshal yashaytti, mangsimu ishek-atliq,

Ejdadimning zémini men shertsiz söygen makan.

Weten yoli üzüldi, quruqluq chong yériqtek,

Shunga temlik ghizamu tétar goya qériqtek,

Wetensizlik qip qoydi bizni susiz béliqtek,

Ejdadimning zémini men shertsiz söygen makan.

Öz öyümning xushluqi put-qolumning boshluqi,

Igisige bilinmes nersining bar-yoqliqi.

Tuyular sel achliqmu qorsaqning bop toqluqi,

Ejdadimning zémini men shertsiz söygen makan.

U yurtta men ötküzgen bexitlik hayat, yashliq,

Mektipide bilim ép, étizda térip ashliq.

Shunga göher körüner saydiki shéghil-tashliq,

Ejdadimning zémini men shertsiz söygen makan.

Bulghanmasta muhiti güzelti zémin, asman,

Yaqqan qarlar ching tonglap mangiti chana rawan.

Méhri bilen qandashliq ötetti xoshal zaman,

Ejdadimning zémini men shertsiz söygen makan.

Weyranchiliq bashlandi ormanliq we yaylaqta,

Sésip ketti kölliri köp adem kep, maghzapta.

Yarilandi her yürek zulumlar we azabta,

Ejdadimning zémini men shertsiz söygen makan.

Chölliride qalmidi köygüdek yantaq-yaghach,

Kölliride qalmidi paqilar we qarlighach.

Baghlirida qalmidi képinek, paxtek, qushqach,

Ejdadimning zémini men shertsiz söygen makan.

Bolup qaldi men ösken ana yurt bir eslime,

Yéter, emdi boldi qil, igisini qestlime.

Xelqimde bar irade, bolmaydu héch teslime,

Ejdadimning zémini men shertsiz söygen makan.

Her tartuqning aldida mushküller we sinaq bar,

Menzildimu közligen yéqin bilen yiraq bar.

«Sen yoqaysen!» sözide köp guman we tirnaq bar,

Ejdadimning zémini men shertsiz söygen makan.

Ana bizge sen weten, hergiz bizni tashlima,

Qilsun yatlar némiler, közüngni héch yashlima.

Atmighiche tang bizge bel qoyushni bashlima,

Ejdadimning zémini men shertsiz söygen makan.

Allah chéchip her yerge shepqetlik nur, harmiding,

Berding hörlük köplerge, wedengdin héch yanmiding.

Pat yéqinda kelgüsi bizgimu nur-yardiming,

Ejdadimning zémini men shertsiz söygen makan.

= =============================================== =

ئەجدادىمنىڭ زېمىنى مەن شەرتسىز سۆيگەن ماكان

ئەركىن سىدىق

2017-يىلى 12-دىكابىر

ئاسىيانىڭ كىندىكى قالدۇرغان كۆپنى ھەيران،

نەچچە مىڭ يىل ياشىغان ئۇنىڭدا خەلقىم ئامان.

خوجايىن بوپ ئۆتكەن ھەم، ھۆرلۈكتە سۈرۈپ دەۋران،

ئاتامىراس تۇپراق ئۇ، مەن شەرتسىز سۆيگەن ماكان.

چەكسىز كەتكەن ئۇ يەردە تاش، قۇملۇق ۋە سايلىق بار،

شۇ قۇم-سايلىق ئاستىدا سۇ، قاشتاش ۋە بايلىق بار.

بىپاياندۇر يايلىقى، كانلىرى كۆپ تاغلىق بار،

ئەجدادىمنىڭ زېمىنى مەن شەرتسىز سۆيگەن ماكان.

بەكمۇ مۇنبەت تۇپرىقى، ئوخشايدۇ كۆكتات-ئاشلىق،

باغقا تولغان ھەممە يەر، يېمىشلەر تەملىك، تاتلىق.

خەلقىم خوشال ياشايتتى، ماڭسىمۇ ئىشەك-ئاتلىق،

ئەجدادىمنىڭ زېمىنى مەن شەرتسىز سۆيگەن ماكان.

ۋەتەن يولى ئۈزۈلدى، قۇرۇقلۇق چوڭ يېرىقتەك،

شۇڭا تەملىك غىزامۇ تېتار گويا قېرىقتەك،

ۋەتەنسىزلىك قىپ قويدى بىزنى سۇسىز بېلىقتەك،

ئەجدادىمنىڭ زېمىنى مەن شەرتسىز سۆيگەن ماكان.

ئۆز ئۆيۈمنىڭ خۇشلۇقى پۇت-قولۇمنىڭ بوشلۇقى،

ئىگىسىگە بىلىنمەس نەرسىنىڭ بار-يوقلىقى.

تۇيۇلار سەل ئاچلىقمۇ قورساقنىڭ بوپ توقلۇقى،

ئەجدادىمنىڭ زېمىنى مەن شەرتسىز سۆيگەن ماكان.

ئۇ يۇرتتا مەن ئۆتكۈزگەن بەخىتلىك ھايات، ياشلىق،

مەكتىپىدە بىلىم ئېپ، ئېتىزدا تېرىپ ئاشلىق.

شۇڭا گۆھەر كۆرۈنەر سايدىكى شېغىل-تاشلىق،

ئەجدادىمنىڭ زېمىنى مەن شەرتسىز سۆيگەن ماكان.

بۇلغانماستا مۇھىتى گۈزەلتى زېمىن، ئاسمان،

ياققان قارلار چىڭ توڭلاپ ماڭىتى چانا راۋان.

مېھرى بىلەن قانداشلىق ئۆتەتتى خوشال زامان،

ئەجدادىمنىڭ زېمىنى مەن شەرتسىز سۆيگەن ماكان.

ۋەيرانچىلىق باشلاندى ئورمانلىق ۋە يايلاقتا،

سېسىپ كەتتى كۆللىرى كۆپ ئادەم كەپ، ماغزاپتا.

يارىلاندى ھەر يۈرەك زۇلۇملار ۋە ئازابتا،

ئەجدادىمنىڭ زېمىنى مەن شەرتسىز سۆيگەن ماكان.

چۆللىرىدە قالمىدى كۆيگۈدەك يانتاق-ياغاچ،

كۆللىرىدە قالمىدى پاقىلار ۋە قارلىغاچ.

باغلىرىدا قالمىدى كېپىنەك، پاختەك، قۇشقاچ،

ئەجدادىمنىڭ زېمىنى مەن شەرتسىز سۆيگەن ماكان.

بولۇپ قالدى مەن ئۆسكەن ئانا يۇرت بىر ئەسلىمە،

يېتەر، ئەمدى بولدى قىل، ئىگىسىنى قەستلىمە.

خەلقىمدە بار ئىرادە، بولمايدۇ ھېچ تەسلىمە،

ئەجدادىمنىڭ زېمىنى مەن شەرتسىز سۆيگەن ماكان.

ھەر تارتۇقنىڭ ئالدىدا مۇشكۈللەر ۋە سىناق بار،

مەنزىلدىمۇ كۆزلىگەن يېقىن بىلەن يىراق بار.

«سەن يوقايسەن!» سۆزىدە كۆپ گۇمان ۋە تىرناق بار،

ئەجدادىمنىڭ زېمىنى مەن شەرتسىز سۆيگەن ماكان.

ئانا بىزگە سەن ۋەتەن، ھەرگىز بىزنى تاشلىما،

قىلسۇن ياتلار نېمىلەر، كۆزۈڭنى ھېچ ياشلىما.

ئاتمىغىچە تاڭ بىزگە بەل قويۇشنى باشلىما،

ئەجدادىمنىڭ زېمىنى مەن شەرتسىز سۆيگەن ماكان.

ئاللاھ چېچىپ ھەر يەرگە شەپقەتلىك نۇر، ھارمىدىڭ،

بەردىڭ ھۆرلۈك كۆپلەرگە، ۋەدەڭدىن ھېچ يانمىدىڭ.

پات يېقىندا كەلگۈسى بىزگىمۇ نۇر-ياردىمىڭ،

ئەجدادىمنىڭ زېمىنى مەن شەرتسىز سۆيگەن ماكان.

© Copyright 2014 Uyghur Meripet  Torbéti 

Visits Number