2017-Yili 15-Séntebir

Qaplidi wetenni térrorluq tuman,

Bopqaldi millitim yatlarning quli.

Qalmidi insanche erkinlik, hoquq,

Qalmidi yashashning imkani, yoli.

Késildi milletning uyghurche tili,

Xarlandi qur'ani, iman hem dini.

Döwlendi azabi égiz tagh bolup,

Yarlandi wujudi, beden hem dili.

Yol qoymas qilchimu yardemchi merdke,

Mumkinmes héch kimge boysunmay shertke.

Ghayib bop yürek-pare ünsiz, déreksiz,

Barghanche ching patti köp yürek derdke.

Ézildi her yürek cheksiz elemde,

Yashawérip ichide dozaxtek apet.

Biz körgen künlerni körmigen yatlar,

Yashimaq bekmu tes bolmisa taqet.

Chiqtuq biz chet elge okyandin atlap,

Ishleshke milletke yurtlarni tashlap.

Aghritar yürekni weten haliti,

Yashaymiz her küni közlerni yashlap.

Özgerdi bu dunya yaman'gha qarap,

Jim turdi derd chüshse uyghur béshigha.

Yashighantuq yatlargha méhriban bolup,

Ey allah ber diqqet uyghur yéshigha.

Ötküzduq köp yilni yatqa béqinip,

Telmürduq bir yerdin yardem kéler, dep.

Uyghurmu tarixta töhpikar bolghach,

Insanliq, adilliq bizni yöler, dep.

Yoqatqach qoldiki malni, bayliqni,

Kelmidi héch yardem biz kütken yerdin.

Tes boldi érishish hésdashliqqimu,

Bikarken bashqisi küresh we terdin.

Bermeydu hurun'gha yardemni allah,

Hörlükchün almisa janlarni qolgha.

Ata qip barini xelqi-yurtigha,

Atlinip küreshke chiqmisa yolgha.

Ündeymen qewmimni sewr qilishqa,

Östürüp eqilni küchni yighishqa.

Wijdanliq, ümidwar, tirishchan bolup,

Milletke, weten'ge ige chiqishqa.

Waz kéchip renggareng mezhep tüzüshtin,

Birlisheyli uyghurlar ortaq niyette.

Épqalmaq mewjutluqni bolsun chin ghaye,

Saqlayli özlerni kélip gheyretke.

Östürgin küchüngni ilim-pen bilen,

Ey xelqim qil ishni eqil-pem bilen.

Tallighin nishanni, charini toghra,

Yükselsun yurt-xelqim sen we men bilen.

= =============================================== =

چاقىرىق

ئاپتورى: ئامېرىكا ئالەم قاتناش ئىدارىسى (NASA) نىڭ ئالىي دەرىجىلىك ئوپتىكا ئىنژېنېرى:

ئەركىن سىدىق

2017-يىلى 15-سېنتەبىر

قاپلىدى ۋەتەننى تېررورلۇق تۇمان،

بوپقالدى مىللىتىم ياتلارنىڭ قۇلى.

قالمىدى ئىنسانچە ئەركىنلىك، ھوقۇق،

قالمىدى ياشاشنىڭ ئىمكانى، يولى.

كېسىلدى مىللەتنىڭ ئۇيغۇرچە تىلى،

خارلاندى قۇرئانى، ئىمان ھەم دىنى.

دۆۋلەندى ئازابى ئېگىز تاغ بولۇپ،

يارلاندى ۋۇجۇدى، بەدەن ھەم دىلى.

يول قويماس قىلچىمۇ ياردەمچى مەردكە،

مۇمكىنمەس ھېچ كىمگە بويسۇنماي شەرتكە.

غايىب بوپ يۈرەك-پارە ئۈنسىز، دېرەكسىز،

بارغانچە چىڭ پاتتى كۆپ يۈرەك دەردكە.

ئېزىلدى ھەر يۈرەك چەكسىز ئەلەمدە،

ياشاۋېرىپ ئىچىدە دوزاختەك ئاپەت.

بىز كۆرگەن كۈنلەرنى كۆرمىگەن ياتلار،

ياشىماق بەكمۇ تەس بولمىسا تاقەت.

چىقتۇق بىز چەت ئەلگە ئوكياندىن ئاتلاپ،

ئىشلەشكە مىللەتكە يۇرتلارنى تاشلاپ.

ئاغرىتار يۈرەكنى ۋەتەن ھالىتى،

ياشايمىز ھەر كۈنى كۆزلەرنى ياشلاپ.

ئۆزگەردى بۇ دۇنيا يامانغا قاراپ،

جىم تۇردى دەرد چۈشسە ئۇيغۇر بېشىغا.

ياشىغانتۇق ياتلارغا مېھرىبان بولۇپ،

ئەي ئاللاھ بەر دىققەت ئۇيغۇر يېشىغا.

ئۆتكۈزدۇق كۆپ يىلنى ياتقا بېقىنىپ،

تەلمۈردۇق بىر يەردىن ياردەم كېلەر، دەپ.

ئۇيغۇرمۇ تارىختا تۆھپىكار بولغاچ،

ئىنسانلىق، ئادىللىق بىزنى يۆلەر، دەپ.

يوقاتقاچ قولدىكى مالنى، بايلىقنى،

كەلمىدى ھېچ ياردەم بىز كۈتكەن يەردىن.

تەس بولدى ئېرىشىش ھېسداشلىققىمۇ،

بىكاركەن باشقىسى كۈرەش ۋە تەردىن.

بەرمەيدۇ ھۇرۇنغا ياردەمنى ئاللاھ،

ھۆرلۈكچۈن ئالمىسا جانلارنى قولغا.

ئاتا قىپ بارىنى خەلقى-يۇرتىغا،

ئاتلىنىپ كۈرەشكە چىقمىسا يولغا.

ئۈندەيمەن قەۋمىمنى سەۋر قىلىشقا،

ئۆستۈرۈپ ئەقىلنى كۈچنى يىغىشقا.

ۋىجدانلىق، ئۈمىدۋار، تىرىشچان بولۇپ،

مىللەتكە، ۋەتەنگە ئىگە چىقىشقا.

ۋاز كېچىپ رەڭگارەڭ مەزھەپ تۈزۈشتىن،

بىرلىشەيلى ئۇيغۇرلار ئورتاق نىيەتتە.

ئېپقالماق مەۋجۇتلۇقنى بولسۇن چىن غايە،

ساقلايلى ئۆزلەرنى كېلىپ غەيرەتكە.

ئۆستۈرگىن كۈچۈڭنى ئىلىم-پەن بىلەن،

ئەي خەلقىم قىل ئىشنى ئەقىل-پەم بىلەن.

تاللىغىن نىشاننى، چارىنى توغرا،

يۈكسەلسۇن يۇرت-خەلقىم سەن ۋە مەن بىلەن.

Kona Yéziq Nusxisi

© Copyright 2014 Uyghur Meripet  Torbéti 

Visits Number