Meripet: Chet Elde Heqsiz Oqush Pursiti

Ford Oqush Mukapatigha Iltimas Qilish Taktikiliri

Yollighuchi: xjdxwhx
Menbesi: http://www.bilik.cn/?dp-bbsthread-20047.html
Mushu mezmun toghrisidiki inkaslarni oqush üchün yoquriqi tor bétini ziyaret qiling.

Hazir bir qisim dostilirimizning ford oqush mukapatigha iltimas qilidighan mezgili, shunga tordashlargha yardimi bolup qalar dep bu yazmini yollidim.

Men özüm melum cheklimiler tüpeylidin ford oqush mukapatigha iltimas qilmighan, lékin etrapimdiki men yéqin ötidighan bir nechcheylen bu oqush mukapatigha iltimas qilip, oqush mukapatigha érishken. Men bu jeryanda bir qisim dostlirimgha iltimas jediwilini qandaq toshquzush toghrisida meslihet bergen. Bir nechche dostumning iltimas jediwilidiki bir qisim xenzuche mezmunlarni in'gilizchige terjime qilip bergen. Qisqisi men bularning telepliri, iltimas jediwili bilen bir qeder tonush.

Hazirgha kelgiche bu oqush fondigha érishken birersi otturigha chiqip iltimas jeryanida özining his qilghanlirini otturigha qoyup baqmidi. Shunga men özümning mushu jeryanda his qilghanlirini köpchilik bilen ortaqlishishni muwapiq kördum.

1. Ford oqush mukapatigha qandaq ademler iltimas qilsa testiqlinishi asan bolidu?

Ford oqush mukapat puli asasiy qatlamdiki, yeni chet-yaqa rayunlardiki örlep oqush pursiti az bolghanlargha bérilidu. Yeni biyjing, shangxey qatarliq bir qanche chong sheherde olturushluq bolmighan yaki mushu rayunlarda xizmette bolmighanlargha bérilidu. Bu yerdiki muhim mesile nawada siz chet-yaqa rayonlarda, yézilarda xizmet qiliwatqan bolsingiz, sizning bu oqush mukapatigha érishish nisbitingiz ürümchide ishlewatqanlargha qarighanda yuqiri bolidu. Nawada siz az sanliq millet bolsingiz, xenzulargha qarighanda érishish nisbitingiz yuqiri bolidu. Méyip bolsingiz, besh ezasi saq ademlerge qarighanda érishish nisbitingiz yuqiri bolidu. Nawada qiz bala bolsingiz, oghullargha qarighanda érishish nisbitingiz yuqiri bolidu. Méning anglighinimda hazir her yili iltimas qiliwatqanlarning ichide qizlar az bolghachqa, bolupmu uyghur qizliri az bolghachqa, ford oqush mukapati ishxanisidikiler uyghur qizlirining köprek iltimas qilishini ümid qilidiken.

Buningdin bashqa bashqurush, teshkillesh iqtidari barlarning testiqlinishi asan bolidu. Uyghur jem'iyitini chüshen'gen, yiza- qishlaqlirimizgha tekshürüshke bérip baqqanlar, pidaiy bolup ishlep baqqanlarning testiqlinishi asan bolidu. Paaliyetchan, oqush mezgilide her xil oyushmilargha eza bolghan, her xil paaliyetlerge aktip qatnashqanlarning testiqlinishi asan bolidu.

Uningdin bashqa, choqum baklawurluqtin yuqiri unwaningiz bolushi, kem digende üch yil xizmet qilghan bolushingiz kérek dégendek telepliri bar. Bu mezmunlar xenzuche tor bette bolghanliqtin men artuq sözlimey, ford oqush mukapat fondining qandaq mukapat ikenliki toghrisidiki mezmunlarni ford fondining xenzuche bétidin körüwalsanglar bolidu.

http://www.china-ifp.org/

2. Ford qandaq kesiplerni bekrek qollaydu?

Ford oqush mukapat fondining qollaydighan kesipliri asasen hemme saheni öz ichige alidu. Lékin iltimas qilghanda öz kespingiz dairsidiki qollinilishchan, jemiiyetke biwaste nep béreleydighan yönilishni tallisingiz testiqlinish nisbitingiz yuqiri bolidu. Mesilen, siz tibbi sahede oqughan bolsingiz,shinjangda yamrap kitiwatqan eydiz késilini dawalash,balilar yuqumluq késelliklirining aldini élish, shinijangda eng köp körülidighan késellerni dawalash, uyghur tibabiti dégendek kesiplerni tallisingiz, nawada qiz bala bolsingiz uyghur ayallirida köp körülidighan késelliklerge ait kesipni tallisingiz, siyasida oqughan bolsingiz kishilik hoquq, insanlar barawerliki témisidiki kesiplerni tallisingiz, iqtisad oqughan bolsingiz, shinijang dihqanlirining kirimini ashurush, yézilardiki éshinicha emgek küchidin paydilinish, jenubiy shinjangdiki melum rayunning sayahetchilikini tereqqiy qildurush dégendek témilarni tallisingiz, edebiyat oqughan bolsingiz 12 muqam tetqiqati, yoqilish girdabigha bérip qalghan medeniyet mirslirini saqlap qélish dégendek uyghur jem'iyitige paydiliq, jiddiy bolghan, qollinilishchan témilarni tallisingiz testiqlinish nisbiti yuqiri bolidu.

3. Iltimas jediwilini toshquzghanda némilerge diqqet qilish kérek?

Eng muhim ish yalghan sözlimeng. Nawada yalghan mezmunni toshquzsingiz, özingizning ishi qamlashmayla qalmastin, buningdin kéyinki uyghurlarning yolinimu étip quyisiz, ularning hazirmu bir qisim uyghurlar ballardin xapa bolghan yerliri barken. Nawada chet'elge chiqip qaytip kelmeslik pilaningiz bolsa, bunnggha iltimas qilmang! (biz sizdin ötünüp qalayli!) jediwel toshquzghanda özingizning ilgiri uyghur jem'iyitige néme ishlarni qlip berginingizni köprek tilgha éling, kichik ishlar bolsimu meyli. Mesilen, mehellide östeng chapqanda ikki kün bikargha ishlep bergen, baqquchisi yoq qoshningizning utunini yérip, süyini tushup bergen, oqushsiz qalghan ballargha iane yiqqanda 10 koy pul bergen, her qétim yurtimizda yer tewrigende, kelkün apiti bolghanda birinchi bolup sawaqdashlarni heriketke keltürüp iane toplighan, mektepte oquwatqanda heqsiz qan teqdim qilghan dégendek jem'iyetke bolghan mes'uliyet tuyghusini ipadileydighan mezmunlarni yézishni untup qalmang. Nawada siz birer yil borun bu oqush mukapat puligha iltimas qilishni oylashqan bolsingiz, bügündin bashlap sawabliq ishlarni köprek qiling. Én'giliz tilidin heqsiz kurs éching, yitimlar mektipige bérip heqsiz ders ötüng. Kembeghellerning ballirining ders tekrar qilishigha yardem béring. Ulargha depter-qelem, kitab élip biring. Qolingizdin kélidighan yaxshiliq bolsila qiliwiring. Yaxshiliq haman yerde qalmaydu. Ford oqush mukapatigha érishelmey qalsingizmu, özingizning qilghan ishidin memnun bolup qalisiz.

Ular yene birsi sizning yashawatqan jem'iyitingizge tesir körsitish küchingizning bar yoqluqigha qaraydu. Bu dégenlik siz oqush bilenla bolmay anche-munche edebiy eserlerni yazidighan bolsingiz, bunimu tilgha élishni untup qalmang. Adem köprek sorunda notuq sözligen tarixingiz bolsa bu téximu yaxshi. Nawada oqutquchi bolsingiz oqughuchilargha hemishe nesihet qilip ularni yaxshi yolgha yitekleydighanliqingizni yézing.

Yene bir mezmun ular sizning bashqurush, teshkillesh iqtidaringizgha qaraydu. Siz oquwatqan mezgillerde yaki ishlewatqan mezgillerde hoquq tutqan bolsingiz, choqum yézing. Chünki hoquq tutqanlarning bashqurush iqtidari bar dep qarilip oqush püttürgendin kéyin uyghur jem'iyitige téximu ijabiy tesirlerni körsiteleydu dep qaraydu. Bashqilarni birer ishqa teshkilligen bolsingiz bunimu yézing. Bumu intayin mohim mezmunning birsi. Oqughan mezgilde her xil paaliyetlerge qatnashqan bolsingiz bunimu choqum tilgha éling.

Yene birsi kelgüsi pélanni toshquzidighan bir jediwili bar. Kelgüsi pilan toshquzghandimu jem'iyetke paydiliq ishlarni qilish pilaningizni tekitleng. "men qaytip kélip mandaq-mandaq nersilerni tetqiq qilimen" dep yazmay, "men qaytip kélip etrapimdiki kishilerni teshkillep mandaq tetqiqatlarni qilimen" dep yézing. "qaytip kélip yézilargha bérip dihqanlarni heqsiz dawalaymen " dep yazmay, "qaytip kélip dihqanlarni dawalaydighan ömek teshkilleshke tirishimen" dep yézing.

Qisqisi, iltimasta özingizni merkez qiliwalmay, özingiz yashawatqan rayon, özingiz yashawatqan ijtimaiy topni merkez qilip torup yézing. Norghun ballar jediwel bek köpken néme yézishni bilmiduq déyshidu. Emeliyette sizning qilghan her bir kichik ishingizdin ular sizning pezilitingizni körmekchi. Ulargha chong tetqiqatchi, alim kérek emes. Peqet yashawatqan jem'iyitige, millitige, ailisige mes'uliyetchan adem kérek. Shunga mushu kichik ishlarnimu yazamdim démey, yaxshi ishla bolsa yéziwiring.

4. Tonushturush xétini kimlerge yazghuzsam bolar?

Fordning tonushturush xéti bir qeder tepsily, uning üstige üch parche yézish telep qilinidu. Bizning oqutquchilirimiz tonushturush xéti yézishqa adetlenmigen, köpinchisige tonushturush xéti yézip bérish xosh yaqmaydu yaki bolmisa "özüng yézip kel, men qol qoyup bérey" deydu. Bundaq waqitta hergiz undaq qilip salmang. Fordtikiler buni peqet yaqturmaydu. Ularning telipide buning hemmisini choqum pirofissor yézip béridu deydighan telep yoq, shunga bir parchini meyli sizge néme ders bergen oqutquchi bolsun, derijisi yuqiri yaki töwen bolsun, sizning ilim-pen'ge bolghan intilishingiz, tirishchanliqingiz toghrisida yazdurung. Birni sizni yaxshi bilidighan bashliq dégendek birsige yazdurung. Nawada bashliq yézip bérishni xalimisa xizmetdash bolsimu boliwiridu. Sizning teshkili - intizamingiz toghriliq yézip bersila boldi. Yene birsini el-aghiningiz bolamdu, ishiqilip sizning pezilitingiz, jem'iyette qilip yürgen ishliringiz toghrisida yézip bersimu bolidu. Chet'eldiki aliy mektepke tonushturush xétini yazghandek choqum pirofissor yazisun deydighan ish yoq.

5. Én'giliz tili sewiyesi zadi qanchilk bolsa yéterlik bolidu?

Adette ular én'giliz tili sewiyesige telep qoymaydu. Lékin iltimas testiqlinip bir yil ichide chet'eldiki melum mektep teripidin qobul qilinishingizni telep qilidu. Ularmu sizning barliq iltimas matériyalliringizni teyyarlashqa yardemlishidu. Mekteplermu adette ford oqush mukapatigha érishken, japasi yoq ballarni qobul qilishni yaxshi köridu. Lékin choqum bir yil ichide til ötkilidin ötüsh telep qilinidighan bolghachqa, adette aliy mektep 4-derijidin töwen sewiyediki ballilarning testiqlinish nisbiti intayin töwen.

6. Tor bette tilgha élin'ghan we tilgha élinmighan mezmunlar.

Ular adette her yili 7-8-aylarda deslepki iltimasni bashlaydu. Deslepki iltimas nahayiti addi. Bir nechche mezmunnila öz ichige alidu. Ular adette bundaq iltimastin her yili 5000 etrapida tapshuriwalidiken. Nurghunlirining xizmet qilghan yili, unwani , nopusi torushluq orni dégendekler telepke uyghun bolmay bulardin 1500 etrapida qalidiken. 10-aydin bashlap resmiy iltimas jediwili tarqitidu, hetta 2-aylarda resmiy iltimasni tapshurup alidighanlarmu bar. Adette 3-ayning otturi yaki axirlidin borun iltimas jediwilini tapshurush telep qilinidu. 4-ayning axiri 5-ayning bashlirida yüz-torane imtihan'gha chaqirtidu. Adette 40 adem testiqlaydighan bolsa 120 ademni chaqirtidu. Yüz-turane imtihan borun künmingghimu orunlashturuluptiken, aldinqi ikki yilghu deymen chungchinggha orunlashturuluptu. Bularning bérip-kélish kirasini, tamaq-yataq hemme chiqimini ford fondi kötüridu. Yüz-turane imtihanda iltimas jediwilide déyilgen mezmunlar sorilidiken. Adette köpinche sizning kéyinki pilaningiz köprek sorilidiken. Uningdin bashqa bir til imtihani orunlashturulidiken. Til imtihanigha köpinche dölet sirtida élin'ghan tofu imtihanining soalini ekilipla alidiken. 8-aylarda resmiy testiqlan'ghanliq xewiri kélidu. Kéyinki bir yil ichide dölet ichide qandaq yerge bérip til ögensingiz 3 ayliq til ögünüsh mezgilidiki barliq chiqimingizni biridiken. Chet'elge iltimas qilghan barliq iltimas matériyallirini ford fondi teyyarliship béridiken, sizge mektep alaqiliship béridiken. Waqti kelgende sizge chet'elge mangidighan ayropilan bélitidin tartip élip béridiken. Oqushqa ötsingizla bir qolpyutir (qol kompiyutir, leptop) élip biridiken. Oqush mezgilide shu yerning otturahal sewiyeside yashighudek xirajet biridiken. Qandaq qiyinchiliq bolsa hel qilip biridiken. Ishqilip, besh yultuz derijilik mulazimettin behrimen bolidikensiz. Oqush püttürgendin kéyin ford shirkiti sizdin bashqa bir nerse telep qilmaydiken. Peqet yaxshi oqup öz yurtingizni güllendürüshke töhpe qoshsingizla bolidiken.

Ford oqush mukapatigha ait yene soraydighan mezmunlar bolsa, inkas qaldursanglar bolidu.