Türkiye hökümitining döletlik oqushmukapat puli bilen Türkiyede oqush pursiti toghrisida

Türkiye hökümiti 1992-yilidin bashlap, Ottura Asiya, Balqan, Ottura Sherq, Afriqa , Rusiye Fédératsiyisi we Yawropa qatarliq rayon we döletlerdiki Türk we Qérindash xelqlerning oqughuchilirigha Türkiyede oqush imkaniyitini yaritip bérish arqiliq, kelgüside Türkiye bilen bu rayon we döletlerning iqtisadi we medeniyet hemkarliqini téximu kücheytish üchün uzun yilliq köp tereplik maarip hemkarliqini yolgha qoyup, izchil türde orunlap kelmekte. Bu maarip hemkarliqining tepsiliy ehwalini töwendiki Türkiye Aliy Maarip Komitéti (YOK=Yuksek Ogretim Kurulu ) tor sehipilirini ziyaret qilip bileleysiz.

1)     http://www.yok.gov.tr/   

2)     http://www.yok.gov.tr/yabanci/Türki.htm

3)     http://www.yok.gov.tr/yabanci/ikili_kulturel.htm

Türkiyediki bu oqushqa Junggodiki Uyghur, Özbék yaki Tatar oqughuchilarmu iltimas qilalaydu. Bu oqushqa iltimas qilishning éniq shertliri towendikidek:

1. Kishiliki (Exlaqi-peziliti)

Türkiyede oqushqa iltimas qilghan oqughuchi choqum exlaqiy, eqliy, jismaniy we rohiy jehettin etrapliq yétilgen, tirishchan, ghayilik we toghra dunya qarashqa ige, öz millitini we Uyghur diyarini qizghin söyidighan Uyghur, Özbék we Tatar yashliridin bolushi telep qilinidu.

2. Kimlikte Uyghur , Özbék yaki Tatar

Salahiyet kimliki bolushi we salahiyet kimlikide milliti choqum Uyghur, Özbék yaki Tatar dep éniq yézilghan bolushi kérek. Qazaq , Qirghiz we bashqa qérindash Türklerni Türkiye Hökümiti Ottura Asiya Rayoni, Rusiye we Ottura Sherq rayonliridin biwasite qobul qilidu.

3. Pasport

Pasport béjirgen bolushi kérek. Eger pasport béjirmigen bolsa,awwal iltimas qilip turup, 2.aydin burun béjirip bolup ewetsimu bolidu.

Aliy mektepte toluq kursta oqumaqchi bolghan oqughuchlarning yéshi 22 din, Magistérliqta (aspirantliqta) oqumaqchi bolghan oqughuchilarning yéshi 28 din, doktorluqta oqumaqchi bolghan oqughuchilarning yéshi 34 din ashmighan bolushi kérek.

Meslihet:

Ichkiride oquwatqan oqughuchilar pasportni asanraq alalaydu.  Pasport élish her bir puqraning qanuni hoquqi. Shunga eng yaxshisi oqush püttürüshtin burun, pasport éliwélish nahayiti paydiliq. Teklipname bolsun yaki bolmisun, awwal sinap béqishingizni tewsiye qilimiz. Teklipname telep qilinip, peqet amal bolmisa,  Türkiyediki birer aliy mektepning til bölümidin teklipname élishqa toghra kélidu. Mektepler bu teklipnamige 70 dollar telep qilidu.

4. Iltimas Jedwili

Töwendiki Türkiye oqushining iltimas jedwilini bésip chiqirip, uni In’gliz tilida toldurung.  Oz we ata-aningizning imzasini Uyghur yéziqida qoyushqa yol qoyulidu.  Teyyar bolghan jedwilini skan qilip, qalghan matériyallar bilen töwendiki usulda birge mangdurup béring:

Iltimas Jediweli [PDF] – Sol tereptiki tékistni cheksingiz, bu iltimas jedwili échilidu.
Iltimas Jediweli [MS-Word]

5. Oqush Netijisi, Sewiye Kinishkisi, Unwan ve Diplom

Tuluq kursta oqush üchün:

1) Aliy mektep toluq kursta oquydighanlarning aliy mektep imtihan omumi pen netijisi, Xenzuche Sewiye Sinash Imtihanidin (HSK) 5-derije kénishkisi we toluq otturini püttürgen diplomining köpeytilgen nusxisi we uning In’glizche terjime nusxisi bolushi kérek.

2)  Aliy mektep netijisi eng töwen bolghandimu tuluq kurs 2-türküm nomur siziqidin yuqiri bolushi kérek.  Uningdin töwenlerning iltimasi qobul qilinmaydu. Aliy mektep netijisi qobul qilish ölchimining eng muhim shertidur.

Türkiyede aliy mektep toluq kursi besh (1+4) yilliq bolup, qobul qilin’ghan oqughuchilar bir yilliq Türk tili teyyarliq basquchini tügkendin kéyin, Türkiyening herqaysi mekteplirige netijisi we arzusigha qarap qobul qilinidu.

Magistérliq (aspirantliq) ta oqush üchün:

1) Aliy mektep tuluq kursni püttürüsh diplomi we dölet bir tutash tarqatqan unwan kinishkisining köpeytmiliri we ularning In’glizche terjime nusxiliri bolushi kérek. Hazir aliy mektepning 4-yilliqida oquwétip iltimas qilidighanlar diplom bilen unwanni 7-aydin burun ewetip bergendin kéyin iltimas andin küchke ige bolidu.

2) Aliy mektepte oqush jeryanidiki pütün derslerning imtihan netijisi we uning In’glizche terjimisi bolushi kérek. Eger shu oqush yili püttürmekchi bolsa 3 yérim yilliq oqush netijilirini ewetip turushi kérek. Bu eng muhim. Chünki oqughuchining tallinish-tallanmasliqi ashu netijisining qandaq bolushigha, oqughan mektipige we kespige baghliq.

3) Dölet bir tutash alghan Aliy Mektep In’gliz Tilidin 4-derije (CET-4) sewiye kinishkisi bolushi kérek.

Türkiyede magistirliq 2 yildin 4 yilghiche. Qobul qilin’ghan oqughuchilar bir yilliq Türkche Teyyarliq tügkendin kiyin Türkiyening herqaysi mekteplirige netijisi we arzusigha qarap qobul qilinidu.

Doktorluqta oqush üchün:

1) Magistirliqni (Aspirantliqni) püttürgen doktorluqta oqumaqchi bolghan oqughuchilarning Magistirliq diplomi we unwani (In'glizche terjimisi qoshup ewetilidu) bolushi kérek.

2) Magistirliq oqushidiki ders netijisi (In'glizche terjimisi qoshup ewetilidu) bolushi kérek. Eger bu oqush yili püttürmekchi bolsa diplomini we unwan guwahnamisini 6- yaki 7-ayda alghandin kéyin tézdin ewetip bérishi kérek.

3) Dölet bir tutash alghan Aliy Mektep In’gilizchidin 4- yaki 6- derije (CET-4,-6) sewiye kinishkisi bolushi kérek.

Türkiyede doktorluq oqushi 4 yildin 6 yilghiche. Qobul qilin’ghan oqughuchilar bir yilliq Türk tili teyyarliq basquchini tügetkendin kéyin Türkiyening herqaysi mekteplirige netijisi we arzusigha qarap qobul qilinidu.

Eskertish:

Netije , Diplom we sewiye kinishkiliri Junggo hökümitining alaqidar organ we tor betliridin tekshürülüp rast-yalghanliqi éniqlan'ghandin kéyin andin küchke ige bolidu. Shunga yalghanchiliq qilishtin saqlinish kérek.

6. Öz-özini tonushturush we Iltimas xetliri

1) Bir parche öz-özini we ailisini tepsiliy tonushturup yazghan tonushturush xéti,

2) Bir parche Türkiyege kélip oqush toghrisidiki Iltimasname bolushi kérek.

Iltimasname we özini , ailisini tonushturush xetliri Uyghur Kona Yéziqida tepsili we retlik yézilishi hem In’gilizchige terjime qilinishi shert.  Öz-özini tonushturush we Iltimasnamilerni choqum özi etrapliq oylinip musteqil yézishi we In’gilizchige terjime qilishi kérek. In’gilizchige terjime qilinmighan tonushturushname we iltimasname qobul qilinmaydu.

7. Oqutquchi we kesp ehlining tewsiyinamisi

Wetende toluq kursni we magistirliqni püttürgen we püttüridighan oqughuchilar özige ders bergen bir oqutquchining (Oqutquchi Uyghur bolsa, Uyghurche we In’glizche, oqutquchi Xenzu bolsa, Xenzuche we In’glizche ) yüzip bergen tewsiyinamisi (Recommendation Letters) we özini obdan bilidighan öz kespige alaqidar ilim-pen sahesidiki bir Uyghur kesp ehlining Uyghurche yazghan tewsiyinamisi bolushi alahide teshebbus qilinidu.  Özige tewsiyiname yézip bergen yuqiridiki 2 shexsning alaqilishish pochta adrési, élxet adrési we téléfon nomurini qoshup ewetip bérishi kérek. Eger oqushqa iltimas qilghanlar köp, riqabet küchlük bolup ketse, bu tewsiyinamilerge alahide qarilip tallinidu.  

Telepler yuqiriqidek. Bu telepke uyghun bolmighanlarning qobul qilinish nisbiti intayin töwen. Emma iltimas qilip sinap baqsa bolidu. Bahalashtin ötüp qalsa ejep emes. Barliq matériyallarni estayidil teyyarlashning tallinishqa jiq paydisi bolidu. Shunga sel qarimang!

Alaqe we meslihette:  Doktor Erkin Sidiq we Yalqun Tash  

Erkin Sidiq we Yalqun Tash bilen alaqilishish üchün, siz töwendiki ikki élxet sanduqigha tengla xet yézing.  Hemde hemme iltimas matériyallirinimu mushu ikki élxet sanduqigha biraqla ewetip béring.  Erkin Sidiq bek aldirash bolghanliqi üchün, bek zörür bolmighan ishlarda Yalqun Tashtin meslihet sorishingizni ümid qilimiz:

Yalqun Tash:         ilimizde@yahoo.com

Erkin Sidiq:          ErkinSidiq @ gmail.com
 

Matériyal Ewetish Usuli:

Yuqirida telep qilin’ghan pütün matériyallarni Scanner (Saomiao) qilip, ret tertip boyiche isim (Mesilen: Iltimas jedwili, pasport, kimlik, diplom, unwan, derije kinishkisi, öz-özini tonushturush xéti, ailini tonushturush xéti, tewsiyiname dégendek xas isimlar) qoyup, yuqiriqi élxet sanduqigha yollap béring. Yéziq sheklini tonumasliqtin kélip chiqqan awarichiliktin saqlinish üchün, barliq kompyutérda yézilghan matéyallarni PDF (Acrobat) höjjiti yaki resim (JPEG) sheklide ewetip béring. Mumkin bolsa eng yaxshisi kompyutérda yézishingizni ümid qilimiz. Barliq matéryallarni toluq teyyarlap bolghandin kéyin, birla waqitta toluq ewetip béring. Sherti toshqanlargha kéyinki qedemde némilerni qilish kérekliki toghrisida éniq yol körsitimiz.

Wetendiki qérindashlirimizning éside bolsunki, bu yolni méngip bérimen dégüchilerge pul bersingiz, siz pütünley aldan’ghan bolisiz. Shunga aldi bilen Erkin Sidiq we Yalqun Tash bilen alaqileshsingiz, ular sizning matériyalingizni körüp, resmiy layaqetlik ikenlikingizge höküm qilghandin kéyin, sizning matériyalingizni Türkiyediki bu oqushqa mes’ul bolghan alaqidar organlargha ewetip, sizning Türkiyege bérip oqushingizgha imkaniyet yaritip béridu.

Iltimas Qobul Qilish Mezgili:

Türkiyediki uqushqa iltimas qobul qilish her yili 1-aydin 4-ayghiche dawamlishidu.

Jem'iy 3 ay möhlet bérilgen. Emma iltimas qilghanlarning layaqetlik bolghanliri belgilik san'gha yetkende namzat tallash aldin axirlishishimu mumkin. Shunga imkan bar burunraq iltimas qilishingizni tewsiye qilimiz. Qanchiki baldur iltimas qilsingiz, tallinish éhtimalingizmu shunche yuqiri bolushi mumkin.