Elyüksel

2016-yili 5-ayning 27-küni

Kona yéziq nusxisi:

http://bbs.izdinix.com/forum.php?mod=viewthread&tid=68098

http://bbs.bagdax.cn/thread-53609-1-1.html

PDF:  http://www.meripet.com/2016/20160527_priorities.pdf

Gherbte keng tarqalghan bir hékaye bar bolup, uningda bir oqutquchining sinipidiki balilargha körsetken mundaq bir tejribisi bayan qilinidu:

 

Oqutquch bir chong quta we on nechche tal chong tashni chiqirip, bir az hepilishish arqiliq héliqi tashlarning hemmisini qutining ichige salidu. Andin bir xalta ushshaq tashlarni qutigha töküp, chong tashlarning ariliqliridiki bosh orunlarni tolduridu. Uningdin kéyin u qutining ichige qum qoyup, qutini silkip, chong tash we ushshaq tashlarning ariliqlirini qum bilen tolduridu. Eng axirida u qutigha su qoyup, uni tolduridu.

 

Yuqiridiki ishlar tügigendin kéyin, oqutquchi oqughuchilardin: «Bu tejribe némini ispatlaydu?» dep soraydu.

 

Bir oqughuchi: «Sizning turmushingiz qilidighan ishlar bilen qanchilik toshup kétishidin qet’iynezer, siz yene azraq wezipini öz üstingizge alalaysiz», dep jawab béridu.

 

Yene bir oqughuchi: «Bir ishni qedem-basquchlargha bölüp we pilanlap élip bérish ünümni eng yuqiri qilishta nahayiti muhim», dep jawab béridu.

 

Üchinchi oqughuchi bolsa: «Bu tejribe ishlarni we bir ishning qedem-basquchlirini muhimliq derijisi boyiche ayrip, andin eng muhimidin bashlap qilishning zörürlükini körsitidu. Eger siz chong tashlarni aldi bilen bir terep qilmighan bolsingiz, quta ushshaq tash we höl qum bilenla toshup ketken bolatti», deydu.

 

Yuqiridiki jawablarning hemmisining orunluq terepliri bar. Emma eng aldida chong tashlarni tépip chiqish we ularni bir terep qilish bizge bir intayin qimmetlik eqilni ögitidu.

 

Meyli xizmette bolsun yaki öz turmushimizda bolsun, eger biz qilishqa tégishlik eng muhim ishlarni tépip chiqip, shularni eng aldida qilip yashaydikenmiz, bizning turmushimiz toluq we netijilik bolidu. Ijtima’iy munasiwet, xizmet, diniy hayat, qiziqish we saxawet ishlirining hemmisi bizdin waqit telep qilidu. Biz özimiz üchün qaysi ish heqiqiy türde muhim ikenlikini békitmisek bolmaydu.

 

Biz köpinche waqitlarda özimizning her bir künini kontrol qilishtin, hetta öz hayatimizning yönilishini kontrol qilishtinmu waz kéchip, özimizning waqtini qandaq ötküzüshni yüz bergen ehwal yaki bashqa kishilerning békitishige tashlap qoyimiz. Shuning bilen biz waqtimizni aldimizgha qaysi ish eng aldida kelgen bolsa shu ishni aldida qilish, yaki kim közimizge eng köp kiriwalghan bolsa shu telep qilghan ishlarni aldida qilish bilen ötküzimiz.

 

Eger biz öz turmushimizdiki chong tash, ushshaq tash, qum we sularni perqlendürmeydikenmiz, biz üchün heqiqiy qimmiti bar ishlarni bir yaqqa qayrip qoyushimiz, yaki ularni untulup qélishimiz mumkin.

 

1-resim:

--Bir yilning qimmitini mewsumluq imtihanidin ötelmigen bir oqughuchidin sorang.

--Bir ayning qimmitini balisi baldur tughulup qalghan bir anidin sorang.

--Bir heptining qimmitini bir heptilik gézit muherriridin sorang.

--Bir künning qimmitini bir 10 balisini baqmisa bolmaydighan künlük ishlemchidin sorang

--Bir sa’etning qimmitini körüshmekchi bolup bir-birini saqlap turghan bir jüp muhebbetleshküchilerdin sorang.

--Bir minutning qimmitini poyizgha kéchikip qalghan bir yoluchidin sorang.

Bir sékuntning qimmitini mashina weqeside hayat qalghan bir kishidin sorang.

--Bir millisékuntning qimmitini Olimpik musabiqiside bir kümüsh médalgha érishken kishidin sorang.

--Özingizdiki her bir deqiqe waqitni qedirleng!

 

 

Paydilinish menbesi:

 

[1] Michael Josephson: « Big Rock First»

http://whatwillmatter.com/2013/05/commentary-826-4-big-rock-first/

 

[2] Unkown author: «TREASURE EVERY MOMENT THAT YOU HAVE!»

http://whatwillmatter.com/2016/05/treasure-every-moment/

 

 

Bu maqalini «Pidakar» qérindishimiz tehrirlidi.

© Copyright 2014 Uyghur Meripet  Torbéti