Erkin
Sidiq
2016-yili
3-ayning 18-küni
Kona yéziq nusxisi:
PDF Nusxisi: http://www.meripet.com/2016/20160318_written_goals.pdf
Yashlarning
öz
hayati üchün turghuzulghan nishani bar bolushning muhimliqini
köpligen ukilar bilidu. Bu heqte menmu burun bir qanche parche
yazma teyyarlidim. 1979-yili Amérika Xarward Uniwérsitétining
Igilik Bashqurush Instituti bir tetqiqat türini élip barghan
bolup, uningda shu yili Xarward Uniwérsitéti Igilik Bashqurush
Institutida oquwatqan oqughuchilardin «Siz özingizning kelgüsi
üchün éniq, qeghezge yézilghan nishanlarni turghuzdingizmu,
hemde ularni emelge ashurush pilanlirini tüzdingizmu?» dep
soralghan. Ashu qétimliq tekshürüsh arqiliq bayqilishiche,
peqet 3 pirsent oqughuchilarning qeghezge yézilghan nishanliri
we pilanliri bar bolghan; 13 pirsent oqughuchining nishanliri
bar bolghan, emma ular öz nishanlirini qeghez yüzige yézip
chiqmighan; hemde qalghan 84 pirsent oqughuchilarning konkrét
nishanliri bar bolmighan.
1-resim:
Nishan’gha yétish.
Ariliqta
10
yil waqit ötkendin kéyin, tetqiqatchilar héliqi oqughuchilar
bilen qayta körüshüp, ular bilen söhbetleshken. Hemde bu qétim
igiligen ehwallargha qattiq heyran qalghan: Héliqi nishanliri
bar bolghan 13 pirsent oqughuchilarning hazirqi yilliq ma’ashi
héliqi nishan turghuzmighan 84 pirsent oqughuchilarning
hazirqi otturiche yilliq ma’ashidin bir hesse köp iken. Héliqi
qeghezge éniq nishanlar we ularni emelge ashurushning
pilanlirini yéziwalghan oqughuchilarning hazirqi yilliq
ma’ashi bolsa qalghan 97 pirsent kishining ma’ashini
birleshtürgen waqittiki kirimdin 10 hesse köp iken.
Muweppeqiyetning
mushundaq
éniq delilliri bar tursimu, mutleq köp sandiki kishiler éniq,
ölchigili bolidighan, waqit cheklimisi bar bolghan nishanlarni
turghuzup turup yashimaydu.
Yuqiridiki
ehwallar
Mark Mekkormek (Mark McCormack)
ning «Xarward Igilik Bashqurush Instituti Sizge Ögetmeydighan
Nersiler» dégen kitabida bayan qilin’ghan.
«Nishanlar»
dégen
dangliq kitabida, Brayyen Tréysi (Brian
Tracy) sizning öz hayatingizda isteydighan ishlarni
tépip chiqish, hemde ashu ishlarni emelge ashurushning
pilanlirini tüzüp chiqishning usullirini bayan qilidu. Hemde u
kishilerning özliri üchün nishan turghuzmasliqining 4 chong
sewebini chüshendüridu:
(1)Ular
nishanning
muhimliqini tonup yetmeydu. Siz köpinche waqtingizni bille
ötküzidighan kishiler, mesilen, a’ile ezaliri, dostliringiz,
sepdashliringiz qatarliqlarning éniq nishani yoq bolidiken,
sizning éniq nishaningizmu yoq bolushning éhtimalliqi nahayiti
küchlük bolidu.
(2)
Ular
nishanlarni qandaq turghuzushni bilmeydu. Beziler bek addiy
nishanlarni turghuzidu. Ular emeliyette hemme kishiler üchün
ortaq bolghan xiyallardinla ibarettur. Yene bir tereptin,
nishan déginimiz éniq bolushi, qeghezge yézilghan bolushi,
konkrét bolushi, we ölchigili bolidighan bolushi kérek.
(3)
Ular
meghlup bolushtin ensireydu. Meghlubiyet azabliq ish, emma eng
chong muweppeqiyetlerge érishish üchün choqum bir qisim
meghlubiyetlerni öz béshimizdin kechürmisek bolmaydu. «Men
meghlup bolushum mumkin», dep ensirep, özingizni nishan
tikleshtin toxtitip qoyushtin saqlining.
(4)
Ular
ret qilinishtin ensireydu. Kishiler köpinche waqitlarda «Eger
men muweppeqiyet qazinalmisam, bashqilar méni tenqidleydu»,
dep ensireydu. Bu mesilini hel qilishning usuli siz
nishaningizni bashqilargha démeslik. Bashqilar peqet siz öz
nishanliringizni emelge ashurup bolghandin kéyin sizning
netijiliringiznila körsun.
Buningdin
kéyinki
hayatingizda özingiz üchün künlük nishan turghuzush we ularni
emelge ashurushni bir adet qiliwéling. Barliqingizni özingiz
isteydighan ishlargha merkezleshtürüng. Özingiz istimeydighan
ishlar üchün küchingizni israp qilishtin saqlining. Bir nishan
qoghlashquchi bolushqa qattiq irade baghlap, shu boyiche
qattiq tiriship, özingiz üchün eng muhim bolghan ishlarni
emelge ashurush yolida tewrenmey ménging.
Paydilinish
Matériyalliri:
Study
about
goals at Harvard MBA program, 1979.
http://www.lifemastering.com/en/harvard_school.html
Bu maqalini inimiz «Pidakar» tehrirlidi.
Bu maqalini héchkimdin sorimay, menbesini
bergen asasta bashqa her qandaq torgha we ündidargha
chiqarsingiz, bésip chiqirip tarqatsingiz, yaki élkitabqa
oxshash bashqa her qandaq shekilde ishletsingiz boluwéridu. Bu
maqale barliq Uyghurlargha mensup.