Séhirgerlikning Ré’alliqi Heqqide Qisqiche Chüshenche
Erkin
Sidiq
2015-yili
12-ayning 3-küni
Kona yéziq nusxisi:
http://bbs.izdinix.com/thread-65673-1-1.html http://bbs.bagdax.cn/thread-40149-1-1.html
http://bbs.bozqir.com.cn/forum.php?mod=viewthread&tid=8356
PDF
Nusxisi: http://www.meripet.com/2015/20151203_jadiger.pdf
Bu
men
torlargha her Jüme küni chiqiridighan maqalilerning biri emes.
Yéqinda chong ongushsizliqqa uchrap, éghir derijidiki rohiy
azabqa pétip qalghan ikki qérindishimiz men bilen alaqileshken
bolup, shu sewebtin menmu melum derijidiki azab ichide
ötüwatqan idim. Aldinqi küni «ilterish» isimlik ukimiz men
yollighan «Némishqa yamanliqlar yüz béridu?» dégen témining
astigha bir inkas yézip, mendin hazir yuqiriqidiki
inilirimizdek rohiy azab ichide ötüwatqan bir singlimizgha
yardem qilishni soraptu. «iltersh»
ukimiz yazghan inkas mundaq iken (Neqil):
«Essalam
bilimxumar aka, meslihetingizge muhtajmen. Bir qiz
barti,yéqinda toy qilidighan yigiti yoshurun yürek késili
bilen tuyuqsiz tügep kétiptu,bu qiz bek tügiship ketti, aghrip
doxturxanidimu yétip chiqti,tüzük tamaqmu yimeydiken,'özini
pat arida ölüp kétidighandek hés qilidiken,turup turup yürikim
siqilip toxtap qalidighandek nepes alalmay qalimen deydu,bu
qiz oqush püttürgili yérim yil qalghan, bek oruqlap
kétiptu,jahanda bar hemme yaxshi gepni didim , teselli berdim,
bu téminimu tewsiye qildim,paydisi bolmaywatidu,'ördekning su
yuqmas génliri barmikin, bir demdin kéyin yene özining
gépinila yorghilitip turuwalidiken,chiraghchi yénigha barghan
chéghiwa, merhum sizni oqutuptiken,yandurmisaq jéningizgha
yürüp kétidu digen oxshaydu,mushu témigha inkas yazimen disem
bilimxumar akam we bashqa akilirimning qandaq meslihetliri
barkin,'anglap özemni ongshiwalsam ejep emes dep sizning
meslihetingizni kütüp olturuwatidu, naümit qoymighaysiz, men
amalsiz qaldim.»
Men
yuqiridiki
uchurni oqughandin kéyin, özümning hérip ketkinige we
waqtimning qisliqigha qarimay, töwendiki yazmini teyyarlidim.
Meqsitim ashu singlimizning azabini bir kün bolsimu baldurraq
yoq qilishtin ibaret. Bu maqalini men normalni tehrirlesh
basquchidinmu ötküzmey turup yollidim.
Méning
chüshinishimche
«iltersh» ukimiz tilgha alghan
ish dinimizda «séhirgerlik, jadugerlik» (sihr, black magic)
dep atilidighan bolup, yutyub (YouTube)
ta Islam dini ölimalirining bu heqte sözligen léksiyiliri
nahayiti köp iken. Yalghuz Yasir Qazining jin we jadugerlik
toghrisida sözligen 1 – 2 sa’etlik léksiye we doklatliridin
üchi bar bolup, men burun uning bezilirini anglap baqqan.
Emma, bu toghruluq téma teyyarlashni pilanimning ichige
kirgüzmigen idim. Emma, yuqiridiki iltimasni oqughandin kéyin,
rohiy zulum ichide azabliniwatqan bir qérindishimizgha
qolumdin kélidighan yardemni qilish meqsitide, Yasir Qazining
bir 2 sa’etlik léksiyisining mezmunlirini qisqiche bayan qilip
ötüshni muwapiq kördüm. Bu Yasir Qazining jin we jadugerlik
heqqidiki 3 léksiyisining ikkinchisi bolup, Yasir Qazi
1-léksiyeni aldi bilen anglap chiqishni bu léksiyeni
anglashning aldinqi sherti qilidu. Emma, u mezmunlar bek uzun
bolup, ularning hemmisini Uyghurchilashturup chiqishqa méning
hazirche imkaniyitim yoq. Shunga men tordashlarning toghra
chüshinishini soraymen. Shuning bilen bille, men tordashlardin
méning bu yerdiki rolum peqetla bir terjiman we xulasiligüchi
ikenlikini, bu yerde bayan qilinidighan bilimlerning hemmisi
Yasir Qazining ikenlikini estin chiqirip qoymasliqini ümid
qilimen.
Yasir
Qazining
mezkur léksiyisining témisi «Séhirgerlik, tumar yaki epsun
oqush yoli bilen yaman weswesini yoqitish, we jinning
ré’alliqi» bolup [1], uning
uzunluqi 2 sa’et iken. U 2014-yili 31-Öktebirde sözlen’gen
iken. Bu léksiyide Qur’an we hedislerdin nahayiti köp neqiller
élin’ghan bolup, men mezkur yazmigha u neqillerni
kirgüzmeymen. Men peqetla ashu léksiyining muhim
mezmunlirinila xulase qilip bérimen.
Bu
léksiyide
«jadugerlik» üchün In’glizche «sihr, black magic»
dégen sözler ishlitilgen bolup, bu yerdiki «magic» dégen söz yulghun lughitide
«Séhirgerlik, jadugerlik, séhri
küch, meptun qilish küchi, séhriy, séhriy küchke ige, meptun
qilidighan» dep izahlan’ghan. Démek, «séhirgerlik»
bilen «jadugerlik» oxshash nersige qaritilghan bolup, töwende
men bu ikki sözni oxshash orunda ishlitimen.
1-resim:
Doktor Yasir Qazi léksiye sözlewatqan bir körünüsh.
Töwendikisi
Yasir
Qazi léksiyisining qisqiche mezmuni.
Séhirgerlik
bilen
jin öz-ara zich baghlan’ghan. Jinning néme ikenlikini
chüshenmey turup, séhirgerlikni chüshen’gili bolmaydu. Bu
uqumlar intayin uzun mezmunlarni öz ichige alidu.
Tilshunasliq
nuqtisidin
élip éytqanda, «séhirgerlik» ning menisi «yoshurun’ghan nerse»
dégendin ibaret. Shunglashqa bu söz Erebchidiki «kéchining
qarangghusi» ni körsitidighan «seher» dégen söz bilen
baghlinishliq. «Séhirgerlik» yüz béridighan, emma biz némishqa
yüz béridighanliqini bilmeydighan bir ishni körsitidu.
Islam
eqidisi
nuqtisidin élip éytqanda, «séhirgerlik» déginimiz jinning
yardimini ishqa sélip, tebi’ettin tashqiri (supernatural)
bir ishni qilish, dégen uqumni bildüridu. Yeni, jin melum bir
ishni qilidighan bolup, biz jinni körelmeydighan bolghachqa,
kishiler u ishning némishqa yüz bergenlikini chüshinelmeydu.
Islam dinidikiler séhirgerlikning qandaq yüz béridighanliqini
bilimiz, emma Islam eqidisini öginip baqmighan bashqa kishiler
uning qandaq yüz béridighanliqini bilmeydu.
Jadugerler
héch
qandaq ishta Allahtin yardem tilimeydu. Ular Allahtin bashqa
yerlerdin, mesilen, bir yalghan xudadin yardem tileydu.
Séhirgerlik
intayin
küchlük bolup, Allahqa ishinidighan ademler, we hetta
peyghemberlermu bezide uningdin ensirep qalidu. Mesilen, Musa
eleyhissalamda ashundaq ish yüz bérip baqqan.
Jadugerlik
melum
bir xil xata chüshenche bolup, u emeliyette bir tebi’ettin
tashqiri hadisini peyda qilalmaydu. Jadugerlerning qilidighini
bizge bir tebi’ettin tashqiri hadise bolup körünidighan hadise
bolup, emeliyette bolsa jadugerler Allahning qudriti bilen
riqabetlishelmeydu. Jin we jadugerler qilidighan ishlar
Allahning qudriti bilen sélishturghanda erzimes kichik
ishlardinla ibaret. Biz jin bilen séhirgerlikning némilikini
biliwalghandin kéyin, ulardin hergizmu qorqmaydighan bolimiz.
Nahayiti éghir bolghandimu, biz jin we séhirgerliktin xuddi
bir yilandin qorqqanchilik qorqushimiz mumkin. Allahqa heqiqiy
ishinidighan kishiler jin bilen séhirgerlikke hergizmu bir
tebi’ettin tashqiri nerse, dep qarimaydu.
Séhirgerlikning
bir
qanche türliri bar bolup, ularning biri séhirgerlikni
kishilerning közlirini boyash arqiliq emelge ashuridu.
Séhirgerlikning
küchi
Allahning qudritini bésip chüshelmeydu. Eger Allah xalisa bir
séhirgerlik hadisisining yüz bérishi tosup qalalaydu.
Qur’anda
déyilginidek,
haraqning azraq paydisimu bar. Emma, séhirgerlikning héch
qandaq paydisi yoq. Yeni, séhirgerlikning paydisi nölge teng.
Séhirgerlik yamanliqtin bashqa nerse emes.
Séhirgerlikning
qandaq
peyda bolghanliqi heqqide bir qanche xil köz-qarashlar mewjut.
Ularning birinchisida mundaq déyilidu: Ademlerge séhirgerlik
qilish usulini perishtiler ögetken. Emma, perishtiler
séhirgerlikni ögenmekchi bolghan kishilerni «Eger siler buni
ögensenglar, siler Musulman bolmaysiler. Allah bizni silerni
sinash üchün ewetken», dep agahlandurghan. Emma bir qisim
kishiler ashundaq agahlandurushqa perwa qilmay, séhirgerlikni
ögen’gen. Ashu kishiler mushu insanlar dunyasidiki eng
deslepki séhirgerler bolup chiqqan. Bügünki künde mewjut bolup
turuwatqan séhirgerliklerning hemmisi ashundaq bir qedimki
weqelik bilen munasiwetlik.
Séhirgerlikmu
öz-ara
oxshimaydighan mez’heplerge bölün’gen.
Séhirgerlikning
qandaq
peyda bolghanliqi heqqidiki ikkinchi köz-qarashta mundaq
déyilidu: Séhirgerlikni perishtiler özliri ögetmigen. Belki,
bir qisim kishilerge séhirgerlikni ögiteleydighan jinlar bar
jayning ornini dep bergen. Hemde u kishilerni «Bizni Allah
silerni sinash üchün ewetken. Eger siler u yerge bérip,
séhirgerlikni ögensenglar, siler kapir bolisiler», dep
agahlandurghan.
Yuqiridiki
ikki
xil köz-qarashning perqi, perishtiler bir qisim kishilerge
séhirgerlikni biwasite ögetkenmu, yaki wasitilik ögetkenmu,
dégendin ibaret.
Qur’andiki
munasiwetlik
ayetlerdin shu nerse éniq boliduki, séhirgerlikni öginish,
séhirgerlikni yolgha qoyush, we séhirgerlikke ishinishning
hemmisi kufirliqqa kiridu. Siz bir
Musulman bolup turup, séhirgerlikni yolgha qoysingiz yaki
uningdin paydilansingiz, yaki uninggha ishensingiz bolmaydu.
Bu nuqta Qur’anda nahayiti éniq otturigha qoyulghan bolup,
kufirliqmu Qur’anning bir qanche yéride tilgha élin’ghan.
Bir
hediste
riwayet qilinishiche, peyghember eleyhissalam séhirgerlikke
bir qétim yoluqup baqqan.
Iman
bilen
teqwaliqning özi bir ademni séhirgerlikning tesiridin pütünley
saqlap qalalmaydu, emma ashu adem uchraydighan tesirni
nahayiti zor derijide kichikliteleydu. Imaningiz qanche
küchlük bolsa, siz séhirgerlikning tesirige shunche az
uchraysiz.
Kishiler
jadugerlikte
eng köp ishlitidighan nerse chach, tirnaq we kiyimge tewe
nersilerdin ibaret.
1. Séhirgerlikke Taqabil Turush
Usuli Heqqide Deslepki Chüshenche
Séhirgerlikke
taqabil
turushning eng asasliq usullirining biri Allahqa du’a
qilishtin ibaret. Jadugerlikke taqabil turushta, uninggha
ishlitilgen nersining qeyerde ikenlikini bilish, hemde uni
tépip weyran qiliwétish intayin paydiliq. Emma,
séhirgerlikning tesirini yoq qilish üchün, uninggha
ishlitilgen nersini tépip yoq qiliwétish shert emes.
Bir
hediste
riwayet qilinishiche, peyghember eleyhissalam bashqa birsining
séhirgerlikige yoluqqanda, perishtiler 113- we 114-sürilerni
oquydu. Yene bir hediste déyilishiche, mushu ikki süre
Allahtin ashu ishtin kéyin chüshidu. Mushu ikki süre
séhirgerlikke taqabil turushning eng küchlük dorisidur.
Sulayman,
Musa
eleyhissalam we peyghember eleyhissalam heqqidiki 3 riwayettin
biz séhirgerlikning heqiqeten mewjut ikenlikini bileleymiz.
Qur’an we sünnettimu séhirgerlik nahayiti éniq otturigha
qoyulghan bolup, uni héch kim ret qilalmaydu.
2. «Séhirgerlik» Dégen Zadi Néme?
«Séhirgerlik»
déginimiz
bizning hazirqi zamanimizdiki hiyle emes. Bazarlarda özlirini
«séhirger» dep atap, her xil hiyle oyunlirini körsitip,
tamashibinlarning könglini achidighan séhirgerlikler bilen biz
bu yerde toxtalmaqchi bolghan séhirgerlik bir nerse emes.
Köngül échish üchün körsitilgen hiyle oyunliri asasen köz
boyamchiliqtin bashqa nerse emes. Sehnilerde körsitilidighan
sanduqning ichidin toshqan chiqidighan, bir ademni heridep
ikki parche qiliwétidighan séhirgerliklerning heqiqiy
séhirgerlik bilen héch qandaq munasiwiti yoq. Méning nezirimde
sehnilerde körsitilgen bir qisim séhirgerlik oyunliri haram
emes. Emma biz undaq nersilerni tewsiye qilmaymiz.
Qur’anda
tilgha
élin’ghan séhirgerlik jinlar bilen munasiwetlik bolup, bizning
bu yerde toxtalmaqchi bolghan, hemde dinimizda cheklen’gen
séhirgerlikmu ene shu.
Biz
jinning
ré’alliqini chüshen’gendila, andin séhirgerlikning
ré’alliqinimu chüshineleymiz. Buning sewebi, jinsiz
séhirgerlik mewjut bolmaydu. Séhirgerler xuddi bir alahide
qudretke ige kishilerdek bir qiyapetke kiriwalidu, emma
emeliyette ularda undaq qudret mewjut emes. Séhirgerlerdiki
qudret jinlarning fizikiliq we tebi’iy xizmitidin bashqa nerse
emes. Eger biz jinlarning tebi’iy halda qandaq ishlarni
qilalaydighanliqi, we ularning qandaq ehwalda séhirgerler
üchün xizmet qilishqa qoshulidighanliqini chüshensek,
séhirgerlikning peqet jinlar tebi’iy halda qilalaydighan
ishlardin bashqa nerse emeslikini bileleymiz. U hergizmu
tebi’ettin tashqiri, sirliq yaki yérim ilahiyliq ish emes.
Jinlar hergizmu qudretlik emes.
Allah
jinlargha
bizge bermigen qudretni bergen, shundaqla bizge jinlargha
bermigen qudretni bergen. Shunglashqa séhirgerler jinlarning
küchidin paydilan’ghanda, biz uninggha chöchüp ketmisekmu
bolidu. Eger bir adem bir atqa minip, aldimizdin uchqandek
ötüp ketse, biz uninggha hergizmu heyran qalmaymiz. Sewebi,
biz uning bir normal ish ikenlikini bilimiz. Emma, eger héliqi
adem min’gen at közimizge körünmey, peqet atqa miniwalghan
ademla közimizge körünidiken, biz hemmimiz heyran qalimiz.
Lékin, u ademni kötürüp yügürüwatqini jin ikenlikini bilsek,
biz uning bir tebi’ettin tashqiri ish emeslikige ishinimiz. Bu
yerde yüz bergen ish jin üchün tebi’ettin tashqiri ish emes,
emma biz üchün, biz yashawatqan dunya üchün u bir tebi’ettin
tashqiri ish bolidu. Shunglashqa, eger biz jinning fizikiliq
we pisxologiyilik mahiyitini chüshensek, biz séhirgerlikni
toluq chüshineleymiz. Hemde shuningdin kéyin uningdin hergizmu
qorqmaymiz. Eger biz qorqtuq, dégendimu, u bizning bir
yilandin qorqqinimiz bilen oxshash derijidiki tebi’iy
qorqushla bolidu. Bundaq ishlarda bizning bir qorqush halitige
kirip qélishimizdiki seweb, bizning jinlarni
körelmeydighanliqimizdin ibaret.
Jin
isi
yoq ottin yaritilghan. Méning chüshenchemche, hazirqi ilim-pen
nuqti’inezeri boyiche qarighanda, jin bir xil énérgiyidin
bashqa nerse emes. Shunga u asasen nurning tézliki bilen
mangalaydu. Uni fizikiliq qurulmilar tosup qalalmaydu. Uning
bu alahidiliki xuddi radi’o dolqunlirigha oxshaydu. «Jinning
eslidiki shekli» deydighan gep yoq bolup, u özining sheklini
xalighanche özgerteleydu. Bu uning mahiyiti. Jin özining
énérgiyisini bir xildin yene bir xilgha özgerteleydu, shunga u
özi xalighanda melum bir shekilde bizge körüneleydu. Hazirqi
ilim-pen nezeriyisi boyiche éytqanda, u körünmeydighan nurdin
körünidighan nurgha özgiridu. Radi’o dolqunliri énérgiyige ige
bolup, u intayin köp dolqunlarni öz ichige alidu. Emma
ularning intayin kichik da’irisidikisi bizning közimizge
körünidu.
Jinlar
jismaniy
jehette ademlerdin küchlükrek kélidu. Yeni otturahal jinlar
otturahal ademlerdin küchlükrek kélidighan bolup, bu xuddi
otturahal erler otturahal ayallardin küchlükrek kelgen’ge
oxshash.
Jin
bir
maddidin bir xil énérgiyige, hemde bir xil énérgiyidin bir
maddigha özgireleydighan bolup, Musulmanlar bekrek köngül
bölüshke tégishlik ishlarning biri mana shu.
Séhirgerlik
dégen
néme? Séhirgerlik déginimiz bir séhirgerning jinlarni ishqa
sélish arqiliq özining hiylilirini körsitishidin ibaret.
Undaqta séhirgerler qandaq ishlarni qilidu? Ular özlirige heq
bérilgende wede qilghan ishlarni qilidu. Mesilen, bir ademning
shirkitini weyran qiliwétish, bir jüp er-xotunni
ajrashturuwétish, we bir jüp er-xotunni baliliq bolghili
qoymasliq qatarliqlar. Bundaq ishlarni séhirgerler jinni ishqa
sélish arqiliq qilidu. Emdi jinning qilidighini bolsa uning öz
dunyasidiki tebi’iy ishlardinla ibaret.
Mesilen,
bir
adem özining shirkitige kétiwatqanda quliqigha «bügün ishqa
barma» dégen awaz kirishi mumkin. Bu ishni jin qilghan bolidu.
Yaki bolmisa u adem tüz kétiwétip, tuyuqsizla qattiq yiqilip
chüshüshi mumkin. Bundaq ehwalda u ademni jin ittirip
yiqitiwetken bolidu. Mushundaq yiqilish arqa-arqidin köp qétim
yüz bérishi mumkin.
Eger
yerde
bir yémish shüpüriki bar bolup, siz shuni dessep yiqilip
chüshken bolsingiz, u hergizmu séhirgerlik bolmaydu. Eger siz
bir xil nachar mehsulatni ishlep chiqirip, uni héch kim
almisa, u hergizmu séhirgerlik bolmaydu.
Séhirgerlikke
yene
bir misal körsitey: Ayalingizning qorsiqidiki bala
arqa-arqidin chüshüp ketsun. Doxtur tekshürüp, siznimu we
ayalingiznimu «normal iken» désun. Mushundaq ehwalda jin melum
xildiki fizikiliq ishlarni qilip, shu arqiliq balini
chüshüriwétiwatqan bolushi mumkin. Eger doxtur mesilini
tapalisa, u séhirgerlikning netijisi bolmaydu. Chünki,
séhirgerlik bir yoshurun nerse bolushi, siz chüshinelmeydighan
nerse bolushi kérek. Her qandaq bir ishning sewebi éniq
bolidiken, u séhirgerlikke tewe bolmaydu.
Allahta
bar
qudret jinda yoq. Jin hergizmu özi üchün tebi’ettin tashqiri
bolghan ishlarni qilalmaydu. U peqet özi fizikiliq jehettin
qilalaydighan ishlarnila qilidu. Mesilen, ademning ichige
kirip, uning qan tomurida méngish dégendek.
Démek,
séhirgerlikning
hemmisi jinning qilmishliridinla ibaret.
3. Némishqa Jin Undaq Ishlarni
Qilidu?
Mundaq
bir
epsane bar: Séhirgerlikte séhirger jinni kontrol qilidu;
séhirger nahayiti küchlük bolup, u jinni özige
boysunduruwalghan, özining maliyi qiliwalghan bolidu. Bundaq
geplerni séhirgerler deydighan bolup, ular shu arqiliq özliri
üchün nopuz tiklimekchi bolidu. Emeliyette u bir epsane, u bir
yalghanchiliq bolup, u pütünley xata.
Emeliyette
séhirger
jinning maliyi yaki xizmetchisi bolidu. Séhirger jin’gha
ibadet qilip, jin’gha xushamet qilidu. Séhirgerler bundaq
ishlarni bashqilargha démey, özlirini xojayin qilip körsitidu.
Shunglashqa
jin
birer ishni qilghan bolsa, uni özi xalighanliqi, özining
shundaq qilghusi bar bolghanliqi üchün qilidu. Hergizmu
séhirgerning qistishi bilen qilmaydu. Jinlarni peqet
Sulaymanla kontrol qilalaydighan bolup, ularni birer adem
kontrol qilalmaydu. Bir ademde jinni kontrol qilghudek qudret
bar, déyish, u ademde Sulaymanda bar qudret bar, dégenlik
bilen barawer bolup, u Qur’andiki sözlerge zit kélidu.
Séhirgerlik
séhirger
bilen jin otturisidiki bir xil soda bolup, uningda séhirger
jin’gha bir nersini bérip, jin séhirgerge bir nersini
qayturidu. U ikkisi bir-birige éhtiyajliq bolup, jin
séhirgerdin küchlükrek kélidu.
Jin
sizning
pulingizgha yaki tamiqingizgha éhtiyajliq emes. Jinlarda
yaritilghandin tartipla bir xil kemsitilish tuyghusi bar
bolup, özlirini insanlardin töwen turidighandek hés qilidu.
Yeni, Allah insanlargha eqil bilen bilimni bergen bolup,
jinlargha ularni bermigen. Hemmimizning xewiride bar
bolghinidek, eqliy emgekning ish heqqi fizikiliq
ishlarningkidin köp yuqiri bolidu. Bizge yene muqeddes kitab
chüshürülgen, we peyghember ewetilgen. Shunglashqa jin her
waqit özini töwenrek orunda turidighan biri hésablap, insanlar
bilen hoquq talishidu. Shuning bilen séhirgerler jin’gha
xushamet qilip, jin némini telep qilsa shuni bérip, jinning
aldida özining yüzini töküp, shu arqiliq jinning fizikiliq
emgek asasidiki xizmitini qolgha keltüridu. Jin bolsa özini
insanlardin üstünrek turghandek tuyghugha kéliwalidu. Bu jin
ige bolidighan nersining birinchisi. Jin ige bolidighan
nersining ikkinchisi bolsa, insanni xata yolgha bashlash. Bir
adem Allahqa ibadet qilmay jin’gha ibadet qilsa, u Islamdin
ayrilghan bolidu. Shuning bilen jin utidu.
Yuqiriqidek
sewebler
tüpeylidin, séhirgerler din’gha azraqmu uyghun kelmeydighan,
oghriliq we adem öltürüshtinmu nechche hesse pes turidighan
nijis ishlarni qilidu. Ularning qilidighini siz oylap
yételigen her qandaq yaman ishtinmu yaman ishlardur. Ular
özlirini jin’gha sétiwétidu.
Séhirgerler
érishmekchi
bolghan asasliq nerse puldin ibaret. Ularning qilidighini bir
kesip bolup, ular ashu kesip arqiliq kirimge érishidu.
Uningdin bashqa ular özining aldigha kelgen kishilerdin üstün
turidighan orun’ghimu ige bolidu.
Séhirgerler
bu
kesipni bashqa séhirgerlerdin ustam-shagirt munasiwiti arqiliq
öginidu.
Jinning
sani
ademningkidin köp bolup, ularningmu derije tüzümi bar bolidu.
Hemde séhirgerler bilen munasiwet qilishqan jin ishlarni özi
qilmay, özining qol astidiki jinlargha qilghuzidu. Jinning
ömri nahayiti uzun bolup, ular nechche yüz yil yashaydu.
4. Séhirgerlikni Qandaq Bayqaymiz?
Musulmanlardiki
eng
éghir mesililerning biri hemme ishlarni séhirgerlikke dönggesh
bolup, bundaq ehwal ayallarda bekrek éghir. Bu bir
pisxologiyilik mesile. Bir mesilige duch kélip, andin «birer
séhirgerlikning tesirige uchridim», dep méning aldimgha
kélidighan kishilerning 95 pirsentining mesilisi séhirgerlik
bolmastin, belki pisxologiyilik mesililerdur. Sizning sodingiz
yaki er-xotunluq munasiwitingiz bezi ongushsizliqqa uchrisa,
siz uni séhirgerlikke dönggeshtin burun, undaq ongushsizliqlar
hemme ademge hemme waqit yüz bérip turidighanliqini estin
chiqirip qoymasliqingiz kérek. Shirket qurghan 10 ademning
ichide 9 adem meghlup bolidighan ishlar dawamliq bolup turidu.
Undaqta
bir
ishning séhirgerlik ikenliki yaki emeslikini biz qandaq
éniqlaymiz? Séhirgerlikning bir qanche alametliri bar.
Ularning ichidiki eng chongi bir ishning tebi’ettin tashqiri
bolushidur. Mesilen, eger siz bir ademning hawada
uchuwatqanliqini körsingiz, u choqum séhirgerlik bolidu. Eger
siz bir jinni körsingiz yaki uning awazini anglisingiz, umu
choqum séhirgerlik bolidu. Emma bizning bu yerde bilmekchi
bolghinimiz unchiwala éniq alametke ige bolmighan
séhirgerliktur. Séhirgerlik tesirining eng köp uchraydighan
alamiti Qur’an qira’et qilinip, ezan towlan’ghandin kéyin bir
ademde körülidighan özgirishning alametliridin ibaret. Qur’an
we ezanni dawamliq anglap bergende, u séhirgerlikning tesirige
uchrighan ademge melum derijide tesir körsitidu.
Séhirgerlikning tesiri qanche küchlük bolsa, Qur’an we
ezanning tesirimu shunche küchlük we shunche téz bolidu.
Bezide
bir
30, 40 yaki 50 yashliq saghlam adem bir obdan yolning üstide
kétip bérip, xuddi bir kim ittiriwetkendek köp qétim yiqilip
chüshidu. Mushundaq tebi’ettin tashqiri hadisimu
séhirgerlikning alamiti bolup hésablinidu.
Bezide
bir
ademning qorsiqi yaki bashqa bir yéri aghrip, doxturxanigha
bérip, her xil tekshürüshlerni élip barghandin kéyinmu,
doxturlar u aghriqning sewebini tapalmaydu. Bumu
séhirgerlikning bir alamitidur. Eger doxtur bir aghriqning
sewebini tapalisa, u hergizmu séhirgerlik bolmaydu. Jin bir
ademde rak késili peyda qilalmaydu. Jin bir xil mikroblarni
peyda qilip, ularni ademning bedinige sélip qoyalmaydu.
Séhirgerlikning
eng
köp uchraydighan bir xili bir jüp er-xotunlarni
ajrashturuwétishtin ibaret. Qur’anda mushuninggha a’it sözler
bar. Er-xotunluq munasiwitide körülidighan tebi’ettin tashqiri
hadisiler séhirgerlikning alamiti bolup hésablinidu.
Melum
bir
weqedin kéyin andin yüz béridighan nahayiti éghir derijidiki
xapiliq we chüshkünlükmu séhirgerlikning alamiti bolidu. Bezi
kishiler nachar mijezlik kishiler bolup, ular pütün ömride
ashundaq yashap kelgen bolsa, ularning bundaq mijezini
séhirgerlik keltürüp chiqarghan bolmaydu. Emma bezi kishiler
izchil halda yaxshi mijezlik bolup, melum bir ishtin kéyin
uning mijezi bashqiche özgirip qalghan bolsa, yeni u bashqa
bir ademge özgirip qalghan bolsa, u séhirgerliktin shundaq
bolghan bolidu. Bundaq ehwal eng köp uchraydighan ehwallarning
biri.
Bir
ademning
tamaq yéyish yaki uxlash aditide tuyuqsiz yaki chüshendürgili
bolmaydighan bir özgirish peyda bolup, andin u adem ashundaq
özgirishni shu boyiche uzun muddet saqlap mangsa, bumu
séhirgerlikning netijisi bolidu. Mesilen, göshke amraq bir
adem tuyuqsiz gösh yémes bolup qélip, andin shu boyiche
göshtin qachidighan bolup qalsa, yeni u adem bu ishtin burun
gösh yéyishni tashlash heqqide birer pilan tüzüp, uni ishqa
qoymighan bolsa, bu séhirgerlikning tesiridin bolghan bolidu.
Bezi
ademler
kéchisi uxliyalmay, bamdat namizidin sel burunqi waqittin
bashlap andin uxlaydighan bolup qalsa, bumu séhirgerlikning
alamiti bolidu. Chünki, sheytan kéchisi uxlimay, bamdat
namizidin burun andin uxlashqa bashlaydu. Bu yerdimu ademde
tuyuqsiz özgirish bolushi, yeni u adem burun normal
uxlaydighan bolup, tuyuqsizla yuqiriqidek ehwal yüz bérishi
kérek.
Bezi
kishiler
bir dem bir xil, bir dem yene bir xil bolup qalidu. Bumu
séhirgerlikning alamiti bolup hésablinidu.
Tipik
ehwalda,
bir ademde yuqiridiki alametlerdin bir qanchisi tengla
körülidu.
Séhirgerlikning
tesirige
uchrighan kishide körülidighan eng muhim alametlerning yene
biri yaman chüsh körüshtin ibaret. Yeni, séhirgerlikning
tesirige uchrighan kishi dawamliq eng yaman, eng bizar, we eng
qorqunchluq chüshlerni köridighan bolup qalidu. Meydisige bir
nerse turuwélip, nepes élishi qiyinliship ketkendek bolup
qélish, özige bir yilan, bir it yaki bir shir étilip kélish,
qéshigha bir nerse kéliwalghandek hés qilish, emma qarisa héch
némini körelmeslik qatarliqlar séhirgerlikning köp
uchraydighan alametliri bolup hésablinidu.
Eger
siz
séhirgerlikning tesirige uchrighandek hés qilsingiz, birer
kishini izdimey, aldi bilen Qur’anni burunqidin köprek oqup
béqing. Eger özingizde héch qandaq özgirish bayqimisingiz, u
halda siz séhirgerlikning tesirige uchrimighan bolisiz.
5. Séhirgerlikke Qandaq Taqabil
Turimiz?
Bezide
jin
bir ademning bedining ichige kiriwélip (possession),
u adem jin’gha özgirip qalidu. Bu xil ehwal Qur’an bilen
sünnetning her ikkiside tilgha élin’ghan. Bezide undaq adem
özini kontrol qilalmas bolup qalidu, emma hoshini yoqatmaydu.
Bezide bir adem özining kontrolluqi bilen es-hoshini
yoqatmaydu, emma ichige bir nerse kiriwalghanliqini hés
qilidu. Yeni, bundaq ishlarning her xil derijisi bar bolidu.
Bundaq ishlar hemme séhirgerlikte mewjut bolmaydu. Bundaq
ehwal eng nachar séhirgerliktila yüz béridu. Köpinche
séhirgerlikte bundaq ish yüz bermeydu. Köpinche ehwalda jinlar
sizning etrapingizda yürüp, sizning ishliringizgha
buzghunchiliq qilidu. Bezide ular qéshingizgha bir qanche
heptide bir qétim kélip, qilidighinini qilidu. Bu xil
séhirgerlikning tesirimu ajizraq bolup, ulargha taqabil
turushmu bir az qiyin bolidu. Mesilen, siz bezide bir qanche
sa’et Qur’an oqughanda, jin qéshingizda yoq bolup qélishi
mumkin. Shuning bilen siz qilghan ish héch bir ünüm bermeydu.
Jin
sizning
ichingizge kiriwalghanda sizde peyda qilidighan azab eng éghir
bolidu. U sizni bezide ghidiqlishi, bezide issitip, bezide
tonglitishi mumkin. Bezide bash aghriqi yaki bashqa
aghriqlarni peyda qilishi mumkin. Undaq aghriqlarni doxturlar
tekshürüp tapalmasliqi mumkin. Bundaq ehwalda jin sizge
fizikiliq tesirlerni körsitidu. Bundaq ehwalni éniqlimaq asan,
emma, jinni qoghlap chiqiriwétish asan emes.
Jinayet
we
adem öltürüsh ishlirining ichidiki bezi eng éghirlirigha qarap
baqidighan bolsaq, ashundaq jinayetni sadir qilghan kishiler
«Bu ish qandaq yüz bergenlikini men bilmeymen. Néme ish
bolghanliqi méning ésimde yoq» deydighan ehwallarmu bar. Mana
bu jin ademning ichige kiriwélip, ademni pütünley kontrol
qiliwalghan ehwallardur. Téxi ötken yili Amérikidiki bir aliy
mektep oqughuchisi yoqap kétip, bir qanche kündin kéyin bir
yiraqtiki déngiz boyidin tirik tépilip, néme ish bolghanliqi u
qizning éside yoq bolup chiqqan bir ehwal metbu’atlarda xewer
qilindi. Mushundaq ishlarning beziliri kishilerning
pisxologiyilik özgirishidinmu yüz béridighan bolup, jin bilen
munasiwetlik ikenliki yaki emesliki üstide obdan tekshürüsh
élip bérishqa toghra kélidu. Pisxologiyimu bir xil heqiqiy pen
bolup, bezide kishiler rohiy késelgimu giriptar bolup qalidu.
Yene bezide bolsa yuqiriqidek ishlar jin bilen munasiwetlik
bolidu.
Undaqta
bu
ikkisini qandaq ayriymiz? Buning eng ünümlük usuli Qur’an
bilen ezandin ibaret.
Bir
adem
séhirgerlikning tesirige uchrighanliqini éniqlap chiqqandin
kéyin, biz uninggha qandaq taqabil turimiz? Bu ishta biz yene
bir dunyagha, yeni jinlarning dunyasigha kirmekchi bolimiz.
Hemde bizde jinlargha taqabil turidighan fizikiliq küch yoq
bolidu. Peqet Allahningla jinlarni kontrol qilalaydighan
qudriti bar. Shunglashqa séhirgerlikke taqabil turushning
birdin-bir usuli Allahning yardimini qolgha keltürüshtin
ibaret. Shundaq qilsaq, Allah séhirgerlikning tesirini yoq
qilip béridu. Allah peyghember eleyhissalamgha shundaq qilip
bergen. Jinni yoq qilishning eng qudretlik qorali Qur’andin
ibaret. Qur’anni anglighanda, jinlar asasen otta köyidu.
Shunglashqa séhirgerlikke taqabil turushning 1-usuli Qur’andin
paydilinishtin ibaret. Bolupmu bizge peyghember eleyhissalam
dep bergen süre Fatihe, süre Beqere, bolupmu 2-süre 255-ayet,
süre feleq (113) we süre nas (114) qatarliqlar bizge
séhirgerlikke taqabil turushtiki eng küchlük qoral bolalaydu.
Jin köpinche ehwalda ademning qéshigha kélip-kétip turidighan
bolghachqa, Qur’anni üzüldürmey oqup turush nahayitimu muhim.
Bu ishta siz bir mexsus terbiye alghan kesip ehlining aldigha
barmisingizmu bolidu. Emma sizning ashundaq kesip ehlilirige
körünüshingiz tewsiye qilinidu.
Bu
ishni
qilghanda siz choqum ashu kesip ehlining toghra eqidige ige
ikenlikige kapaletlik qilalishingiz kérek. Chünki
séhirgerlikning tesirini yoqitish kespi bilen
shughullinidighan kishilerning köpinchisi özliri séhirgerlik
bilen shughullinidighan kishiler. Shunglashqa siz ashundaq
kishilerdin birsining qéshigha bérip, özingizni dawalap
qoyushi üchün uninggha pul bersingiz, u adem bashqa bir
jinning yardimi bilen eslidiki jinni qoghliwétidu. Emma
eslidiki jinning ornini yéngi jin alidu. Bezide jin mafiyeliri
otturisida toqunush peyda bolushimu mumkin. Hergiz we zadila
séhirgerlikke séhirgerlik bilen taqabil turmang. Undaq
qilsingiz sizning ehwalingiz téximu éghirliship kétidu.
Siz
izdep
barghan ademning bir séhirger ikenliki yaki emeslikini siz
qandaq bileleysiz? U intayin asan. Siz uning sizdin néme
ishlarni qilishni telep qilghanliqi, hemde özining néme
ishlarni qilghanliqigha qarap baqsingizla bolidu. U kishining
sizdin telep qilghini pul ikenliki yaki emesliki toghra ölchem
bolalmaydu. Chünki sizdin durus ademlermu pul telep qilishi
mumkin. Pul telep qilish gunah emes. Bu yerde bir ademning
séhirger ikenliki yaki emeslikini biliwélishning birdin-bir
usuli u ademning néme ish qilghanliqi we sizdin néme ish
qilishni telep qilghanliqidin ibaret. Eger u adem sizdin bir
qisim ghelite ishlarni qilishni telep qilsa, mesilen, bir
toxuni öltürüp, uning qénini ichish, yérim kéchide yerge bir
nerse kömüsh, sizdin kiyimingizning bir parchisini élish,
sizning chéchingizni élish, sizning apingizning ismini sorash,
dégendek, meyli u ademning buruti qanchilik uzun bolsun,
qorsiqi qanchilik chong tompayghan bolsun, u ademning özi
choqum bir séhirger bolidu. Eger siz méning aldimgha kélip,
sizdiki séhirgerlikning tesirini yoqitip bérishni telep
qilsingiz, sizning apingiz yaki dadingizning ismining bu ish
bilen néme munasiwiti bolsun? Eger siz késel dawalighili bir
doxturning aldida barsingiz, u doxtur sizning apingizning
ismini sorimaydu. Jinlar öz dunyasida sizning apingizning
ismini bilishke mohtaj. Séhirgerlikning tesirini yoqitish
ishini heqiqiy türde toghra qilidighan kishi choqum késelge
giriptar bolghan kishini aldigha chaqirip ekélidu. Hemde
yuqiriqidek qalaymiqan nersilerni telep qilmaydu. Bu xuddi bir
doxtur bir késelni dawalighan bilen oxshash. Eger siz
körüshken kishi sizdin Qur’anni köplep oqushni, namazni
dawamliq oqup turushni, zikir qilishni, ezan towlashni telep
qilghan bolsa, siz bir durus ademning aldigha barghan bolisiz.
Qilsimu
bolidighan
yene bashqa bezi ishlarmu bar. Mesilen, Qur’andiki ayetni bir
qeghezge yézip, u qeghezni sugha chilap, andin ashu suni
ichish. Eger bir adem sizge her xil ghelite shekiller
sizilghan we sanlar yézilghan bir qeghezni béridiken, u adem
Qur’an we sünnet boyiche ish qilmighan bolidu. Qeghezge
Qur’andiki birer ayetni toluq yazsa bolidu, emma uningdin
bashqa nersini yazsa bolmaydu. Bashqa ghelite nersiler
yézilghan qeghez asasen jinlar bilen alaqilishish üchün
teyyarlan’ghan bolidu.
Xulasilisek,
séhirgerlik
unchiwala qorqup kétidighan bir nerse emes. Séhirgerler yaman
yaki rezil ademler bolup, ular özlirini jinlargha sétiwetken
bolidu. Sizning tutqan yolingiz qanche toghra, sizning
teqwadarliqingiz qanche küchlük bolidiken, siz séhirgerlikning
tesirige shunche az uchraysiz. Toghra yol tutqan teqwadar
kishilermu bezide séhirgerlikning tesirige uchraydu.
Séhirgerlerge taqabil turushning birdin-bir usuli Allahning
yardimini qolgha keltürüsh we teqwadarliqni kücheytishtin
ibaret. Eger mumkin bolsa séhirgerlik üchün ishlitilgen
nersini tépip, uni yoq qiliwéting.
Doktor
Yasir
Qazining léksiyisi mushu yerde axirlashti. Men mezkur
yazmining «iltersh» ukimiz tilgha alghan singlimizgha, we
shuninggha oxshash bashqa nurghun qérindashlirimizgha bir az
paydisi bolushini ümid qilimen.
Paydilinish matériyali:
[1]
The
Reality of Sihr (Black Magic), Exorcisms & Jinns - Part
II
https://www.youtube.com/watch?v=szMpZQL9HZo
[2] The Reality of Jinn in the Qur'an
and Sunnah
https://www.youtube.com/watch?v=ZzhSwxJQAFU
Bu maqalini inimiz
«Pidakar» tehrirlidi.
Bu
maqalini
héchkimdin sorimay, menbesini bergen asasta bashqa her qandaq
torgha chiqarsingiz, yaki élkitabqa oxshash bashqa her qandaq
shekilde ishletsingiz boluwéridu. Bu maqale barliq
Uyghurlargha mensup.