Méning
2-Kitabim Chiqti
Erkin
Sidiq
2015-yili
11-ayning 24-küni
Kona yéziq nusxisi:
http://bbs.izdinix.com/thread-65561-1-1.html http://bbs.bagdax.cn/thread-39787-1-1.html
http://bbs.bozqir.com.cn/forum.php?mod=viewthread&tid=8308
PDF
Nusxisi: http://www.meripet.com/2015/20151124_ikkinchi_kitab.pdf
Bir
qisim
oqurmenlerning xewiride bolghinidek, men 2007-, 2008- we
2009-yilliri yézilghan maqalilerni toplap, bir kitab qilip,
2015-yili 10-Öktebir küni Istanbulda neshr qildurghan idim.
Men yene 2010-yilidin 2015-yili
Iyulghiche yézilghan «kishilik tereqqiyat» qa a’it maqalilerni
toplap, 2015-yili 20-Noyabir küni Istanbulda neshir qildurdum. Bu kitabqa 13 parche
maqale kirgüzülgen bolup, uning ichidiki «Ghayini ré’alliqqa
aylandurushning sirliq qanuniyiti» dégen bir maqale 12
bölümdin teshkil tapqan.
Kitab jem’iy 352 bet. Kitabqa «Erkin
Sidiq Yazmiliri: Kishilik Tereqqiyat Heqqidiki Yazmilar
(2-qisim)» dep mawzu qoydum. Töwendiki resimlerde
körsitilgini ashu kitab heqqidiki bir qanche körünüshler.
1-resim: Kitabning aldi
we arqa tashlirining körünüshliri.
2-resim: Kitabning
munderijisi
Men
mezkur
kitabni peqet weten-ichi we sirtidiki intérnéttin paydilinish
imkaniyiti yoq qérindashlarning, bolupmu yash-ösmürlerning
paydilinishi üchünla teyyarlighan bolup, uning 1000 parchisini
pütünley öz chiqimim bilen neshr qildurdum. Bu kitab nahayiti
erzan bahada sétilidighan bolup, mushundaq bahada sétilghanda
kitabning bésilish heqqi chiqip, yene azraq kirim bolidu. Men
bu kitabtin kiridighan hemme kirimni xuddi 1-kitab bilen
oxshashla Istanbulda Uyghur oqughuchilar we Uyghur ma’aripi
üchün xalisane ish qilip, saxawet ishliri bilen
shughulliniwatqan bir qisim qérindashlargha i'ane qildim.
Uning élkitab (PDF) nusxisini
heqsiz tarqitiwatimen. Chet
eldiki qérindashlardin bu höjjetni towendiki ulinishtin
chüshürüwélishni soraymen:
http://www.meripet.com/2015/20151124_ikkinchi_kitab.pdf
Kitabning
basma
nusxisini sétiwalmaqchi bolghan qérindashlar töwendiki
3-resimdiki uchur arqiliq inimiz Abdul’eziz Beshtoghraq bilen
alaqileshse, yaki uni Istanbulda yashawatqan Uyghur
wetendashlar achqan kitabxana, réstoran, méhmanxana we
dukanlardin sétiwalsa bolidu.
3-resim: Inimiz
Abdul’eziz Beshtoghraq bilen alaqilishish uchurliri. Élxet
adrési: « tedbirltd@gmail.com
»
4-resim: Ikkinchi
kitabning yene bir qanche körünüshliri.
Töwendikisi
kitabning
«Kirish Söz» qismi. Uning astigha kitabning «Neshiriyattin»
dégen yene bir kirish söz qisminimu qoshup qoydum.
Kirish
Söz
Men
hazirghiche
yézip teyyarlap, torlarda élan qilghan maqalilerdiki
mezmunlarning ichide mundaq ikki mezmunmu bar. Uning biri,
qandaq qilghanda buyrulghan yardemge érishkili bolidighanliqi
mesilisi. Yene biri bolsa allahning neziride insanlarning
qaysi ishi eng qedirlik ikenliki mesilisi.
Men
birinchi
mesilide hediste bayan qilin'ghan hadisilerni asas qilip,
hazir dunyada eng tereqqiy qilghan eller bilen musulmanlar
dunyasini sélishturup, özümning közitishi we analizi asasida
yekünlep chiqqan mundaq bir xulasini otturigha qoydum:
buyrulghan yardemge érishish üchün, choqum tashtek uyushup,
özining barliqini atap, qattiq tirishish kérek. Shundaq
qilghanda her qandaq bir qowm meyli dini bar yaki yoq bolsun,
meyli étiqadi bar bolsun yaki yoq bolsun, meyli musulman
bolsun yaki bolmisun, buyrulghan yardemge érisheleydu.
Men
ikkinchi
mesilide amérikida turidighan, musulmanlar dunyasida tonulghan
we küchlük tesirge ige diniy zat "oyghan" ning töwendikidek
köz qarashlirini bayan qildim: muqeddes kitabimizda mundaq
déyilgen: "insanlar özliri intilip qattiq tirishchanliq
körsetken nersilerdin bashqa paydiliq nersilerge
érishelmeydu." bu yerdiki eng muhim nerse "intilish" we
"tirishchanliq" bolup, insanlarning yaratquchimiz eng
qedirleydighan ishliri ashu ikki ishtin, yeni "intilish" bilen
"tirishchanliq" tin ibaret. Yaratquchimiz her qandaq bir
ademge ashu ademning yoshurun qabiliyiti dairisining sirtidiki
ishlarni yükligen emes. Shunglashqa sizde ishlarni hazirqidin
yaxshiraq qilalaydighan qabiliyetler bar. Ishlarni hazirqidin
köprek qilalaydighan qabiliyetler bar. Yaratquchimiz sizdin
peqet özingizdiki yoshurun qabiliyetlerning eng töwen chékige
chushluq ishlarnila qilishni kütmeydu, belki uning eng yuqiri
chékige chushluq ishlarni qilishni kütidu. U sizni qandaq
xuruchlar bilen yaratqan bolsa, sizdin ashu xuruchlarning
hemmisini toluq ishqa sélishni telep qilidu. Hemde waqti
kelgende sizning öz rolingizni qandaqraq jari
qildurghanliqingizdin jawab alidu.
Ilim-pendimu
dinimizdiki
"intilish", "tirishish", we "buyrulghan yardemge érishish"
dégen uqumlar bilen oxshash menidiki uqumlar mewjut. U bolsimu
"ghaye tiklesh", "ghaye üchün qattiq tirishish", we "ghayini
réalliqqa aylandurush" qatarliq uqumlardin ibaret.
Bu
kitab
men hazirghiche neshr qildurghan 2-kitab bolup, uninggha
kirgüzülgen köpinche maqaliler ghaye tiklesh, ghaye üchün
qattiq tirishish, we ghayini réalliqqa aylandurushqa ait ilmiy
köz-qarash we ilmiy nuqtiinezerlerni asasiy mezmun qilghan.
Uningda otturigha qoyulghan köz-qarash we nuqtiinezerler uzun
muddetlik ilmiy tetqiqatlar netijisige asasen yekünlep
chiqilghan, hemde gherbtiki salahiyetlik we nopuzluq ijtimaiy
pen ziyaliyliri teripidin otturigha qoyulghan. Eger siz bu
penniy uqumlarni men yuqirida tilgha alghan diniy uqumlar
bilen birleshtürüp oqup, toluq hezim qiliwalsingiz, öz
hayatingizni menilik ötküzüsh, qilghan ishingizni
muweppeqiyetke érishtürüp, közligen ghayingizni emelge
ashurush, shu arqiliq özingizni, xelqimizni we allahni razi
qilish jehette zor paydigha érisheleysiz.
Men
torlarda
élan qilghan maqalilerning wujudqa kélishi we bu kitabning
royapqa chiqishi üchün özümdin bashqa yene nurghun
kishilerning ejri singgen bolup, men bir qisim
qérindashlarning töhpisini özümning birinchi kitabining
"kirish söz" qismida qisqiche tilgha aldim. Men u "kirish söz"
ni téxi oqup baqmighan oqurmenlerdin uni bir qétim oqup
chiqishni soraymen. Méning maqale teyyarlishim we kitab
chiqirishimgha hazirmu chet eldiki xéli köp qérindashlar rohiy
we emeliy yardemlerni qiliwatidu. Men bu yerde ularning
hemmisining ismini bir-birlep tilgha élip bolalmaymen. Emma
ismini choqum tilgha almisam bolmaydighan ikki ukimiz bar.
Ularning biri méning köpinche maqalilirimni torgha
chiqirishtin burun tehrirlep bergen, we ularni qayta bir qétim
yuqiri telep bilen tehrirlep, kitab üchün teyyar qilghan, we
kitabning höjjitini bir qolluq teyyarlap chiqqan qedirlik inim
"pidakar" din ibaret. Ularning yene biri bolsa méning
kitablirimni basturush we tarqitish ishlirining hemmisini bir
qolluq qilip bériwatqan qedirlik inim abdul'eziz
beshtoghraqtin ibaret. Men bu ikki ukimizgha qanchilik rehmet
éytsammu azliq qilidu.
Axirida
men
bu kitabnimu milletning ghémini öz menpeitidin üstün orun'gha
qoyup, milletning teqdirini yaxshilash yolida pak yürek bilen
toxtawsiz, ün-tinsiz we özining barliqini atap tirishchanliq
körsitiwatqan barliq qérindashlargha béghishlaymen.
Erkin
sidiq
amérika
kaliforniye
shtati los anjélis shehiri
2015-yili
17-öktebir
=
============================================================ =
Uyghurlar
arisidiki
kishilik tereqqiyatqa ait kitablar éhtiyajni héch
qamdiyalmaywatidu. Ixtisasliq xadimlarni yétishtürüp chiqirish
üchün bu xildiki kitablarning üzülüp qalmay, ilghar sewiyide
yézilip we neshr qilinishigha künlük üch wax tamiqimizdinmu
bekrek éhtiyajimiz bar, dep oylaymiz.
Bu
sahede
mol hosulluq alimimiz doktor erkin sidiq ependi xelq'ara
ilghar sewiyidiki kishilik tereqqiyat usullirida özini
tereqqiy qildurush bilen birlikte, nezeriye bilen emeliyetni
organik halda birleshtürüp, emeliy tejribisidin ötküzüp,
qolgha keltürgen méwisini ammibab uyghur tilida maqale qilip
yézip chiqip, her peyshenbe axshamliri jümelik hediye süpitide
uyghurlarning eng erkin we serxil munberlirige sunup
kéliwatidu. Uning kelgüsimizning igisi ümidwar tirishchan
yashlirimizni yéteklesh meqsitide hazirlighan "kishilik
tereqqiyat heqqidiki yazmilar" namidiki 1-kitabi uyghur
akadémiyisi orunlashturup, istanbulda 2015-yili 10- we
11-öktebir échilghan xelq'araliq ilmiy muhakime yighinida
neshr qilinip, qisqa muddet ichide her sahediki
oqurmenlirining qizdin alqishigha érishti.
Doktor
erkin
sidiqning qolingizdiki 2-kitabi 1-kitabtiki yazmilarning
mentiqiy dawami sheklide bolup, uningda héssiyatqa
bérilmestin, özimizni obdan dengsep, tikligen ghaye we
nishanlirimizni emelge ashurushning ilmiy usulliri we ünümlük
métodliri bayan qilin'ghan.
Mezkur
kitabtiki
mezmunlar oqurmenlerning özige we elge nep béridighan xeyrlik
pilan-lahiyelirini emelge ashurush jeryanida duch kelgen
musheqqetlerni ghelibe yolidiki pelempiyi qilip, üzlüksiz
izdinishning ijabiy énérgiyisige aylanduridighan kichikkine
bir uchqun bolalaydighanliqigha ishinimiz.
Her
kim
we her xelq özini özgertmigüche allah ularning ehwalini
özgertmeydighanliqi (süre red 11-ayet we süre enfal 53-ayet)
özgermes qanuniyet ikenliki hemmimizge melum. Shundaqla her
kim özining ejrige layiq netije alalaydighanliqimu eng adil
mukapattur.
Öz
teqdirining
tömürchisi bolghan insaniyetning ayrilmas bir qismi bolghan
uyghur xelqiningmu bu kitabtin tégishlik nésiwisini
alalaydighanliqigha ishinimiz.
2015-yilini
"kitab
oqush yili" qilip belgiligeniduq. Kitab oqush yilining axirqi
mezgilide, neshriyatimiz halal emgekning méwisi bolghan ushbu
eserni qedirlik kitabxanlargha teqdim qilishqa muyesser boldi.
Bu mubarek xizmetke bizni wesile qilghan, ebedi saadetke
érishish yolini hayat kitabi qur'an bilen körsitip bergen
allahqa cheksiz shükürler bolsun.
Bu
xildiki
kitablarning méghizini chéqip, temi téxi éghizingizdin
ketmestin 3-kitabni eqil xurjuningiz bolghan kitabliqingizgha
tizishimiz üchün heriket qilidighanliqimizgha ishining.
Kishilik
tereqqiyatqa
ait kitablarni neshr qilish neshriyatimizning asasliq xizmet
nishanidur. Hayat kitabi qur'an kündilik hayat prinsipimizni,
dunya qarishimiz we yashash aditimizning shekillinishide hel
qilghuch rol oynaydu. Musteqil kitab hésablinidighan insan,
kainat we hadisiler yaratquchining barliqining delilliridur.
Ular heqqidiki kitablar bolsa özimizni chüshinish we
yaratquchimizni tonushta, paydilinishimiz üchün biz
insanlargha boysundurup bérilgen kainatni tonush we uningdin
téximu ünümlük paydilinishta intayin muhim qimmetke ige.
Neshriyatimiz allah yaratqan hayat kitabi qur'an, insan
kitabi, kainat we hadisiler kitabini toghra chüshinishingizge
yardemde bolidighan eserlerni neshr qilip, hayat
musapingizning ongushluq dawam qilishi üchün yéqilghan sham
bolushqa teyyar. Tedbir neshriyati siz bilen köklep
yashnighusi.
Hörmet
bilen,
tedbir neshriyatidin mes'ul muherrir
Abdul'eziz
beshtoghraq
2015-yili
27-öktebir,
Istanbul
Wetendikiler
1-kitabning PDF nusxisini töwendiki ulinishlardin
chüshüriwalalaydu:
(2) http://www.kitaphumar.net/?p=504
(3)
http://torkitap.com/books/20151010_erkin_sidiq_birnchi_kitab.pdf