http://bbs.izdinix.com/thread-64575-1-1.html

http://bbs.bagdax.cn/thread-32939-1-1.html

http://bbs.bozqir.com.cn/forum.php?mod=viewthread&tid=7835

 
PDF Nusxisi:  http://www.meripet.com/2015/20150821_jpl_posdoc_day.pdf

Bu yil 18-Awghust küni (yeni aldinqi  Seyshenbe küni) NASA merkizi J P L de «J P L diki doktur-ashti xadimlarning tetqiqat küni» dep atilidighan bir pa’aliyiti ötküzüldi.  Bu pa’aliyette hazir J P L de doktur-ashti bolup ilmiy tetqiqat élip bériwatqan 50 neperge yéqin tetqiqatchilar özliri aldinqi bir yil ichide qolgha keltürgen ilmiy tetqiqat netijilirini tam géziti (poster) sheklide körgezmige qoyup, J P L diki bashqa xadimlarning közdin kechürishige sundi.  Besh sa’et dawamlashqan bu pa’aliyettin kéyin, bizning idaridiki bir guruppa mutexessislerdin terkip tapqan bir bahalash komitéti bu tetqiqat netijilirini bahalap, her bir katégoriyening ichidin birdin eng yaxshi tetqiqat netijisini tallap, ashu tetqiqatning igilirini neq meydanda mukapatlidi. 

Bu qétimqi tetqiqat körgezmisi töwendiki katégoriyelerdin terkip tapqan:

--Astronomiyilik fizika we ka’inat ilmi

--Yer shari ilmi

--Planéta ilmi we tashqiy planétidiki hayatliqlarni bayqash

--Yéngi téxnologiye, eswab-üsküniler, we inzhénérliq

Bu qétim 50 neper etirapidiki doktur-ashtilar özlirining tetqiqat netijilirini körgezmige qoydi.

NASA her yili xéli köp miqtardiki tetqiqat xirajitini nahayiti küchlük riqabet asasida aliy mektep proféssorliri we NASAdin bashqa tetqiqat orunliridiki tetqiqatchilargha «tetqiqat puli» (research grant) süpitide teqsim qilip béridu.  Shundaqla bir qisim proféssorlarni J P L gha kélip, bir mezgil ilmiy tetqiqat bilen shughullinishqa orunlashturidu.  Bezide ashundaq proféssorlarning qolida oquwatqan dokturluq oqughuchiliri bizning idarige kélip, bizning idaridiki birer xadimning yétekchilikide bir mezgil ilmiy tetqiqat bilen shughullinidu.  Uningdin bashqa her yili xéli köp sandiki yéngidin dokturluq unwanigha érishken yashlar doktur-ashti salahiyiti bilen bizning idarige kélip, bir-ikki yil ilmiy tetqiqat bilen shughullinidu.  Tetqiqat mezgili toshqanda ularning ichidiki bizning idaride ishleshke sherti toshidighan (mesilen, Amérika grazhdanliqi bar bolghan) bir qismini bizning idare xizmetke alidu.  Burun ashundaq bir yash Türkiyedin bizning idarige kelgen bolup, ikkimiz pat-pat chüshlük tamaqni bille yigech parangliship turghan iduq.  Ikki yildin kéyin u tetqiqatini tamamlap, Kaliforniyediki bir aliy mektepning proféssorluqigha iltimas qildi  (Amérika yuqiri derijilik unwanigha ige bir qisim chet elliklerning «alahide mutexessis» katégoriyisi boyiche Amérikigha grazhdan bolishigha yol qoyidu).  Men bu ish üchün telep qilin’ghan 3 mutexessisning biri bolup, heliqi Türkiyelik yash üchün Amérika hökümitige «Teshebbus xéti» yézip bergen.  U yash axiri ashu yol bilen Amérikida proféssor bolup qélip qaldi.  Men eyni waqittiki uning bilen chüshlük tamaqni bille yep ötküzgen künlerni tolimu séghindim.  Men hazir J P L ge yene birer Uyghurning xizmetke kirishini teqezzaliq bilen kütiwatimen.  Bizning idarige kirip ishleshke sherti toshidighan qérindashlar bar bolsa, ularning men bilen alaqilishishini ümid qilimen.

Amérika bir qisim döletlerning grazhdanlirining NASAdek orunlarda doktur-ashti yaki resmiy xizmetchi bolup ishlishige yol qoymaydu.  Junggo grazhdanliri NASAgha resmiy xizmetchi bolup kirelmeydu.  Emma doktur-ashti bolalamdu-yoq, men uni bilmeydikenmen. Eger doktur-ashti bolup ishleshke sherti toshidighan qérindashlar (mesilen, Junggodin bashqa döletlerning grazhdani bolghan yaki Amérika nopusigha ötken) bar bolsa, töwendiki tor béti arqiliq mushu programmigha iltimas qilip baqsa bolidu:

https://postdocs.jpl.nasa.gov/

Men bu qétimqi tetqiqat körgezmisini bir qur körup chiqtim.  Uningda «qarangghu madda» we «qara öngkür» heqqidiki tetqiqatlar xéli chong salmaqni igileydiken.  Töwendikisi ashu kündiki doktur-ashti tetqiqat körgezmisining men yanfun bilen tartiwalghan bir qisim körünishliri. 

© Copyright 2014 Uyghur Meripet  Torbéti 

Visits Number