Erkin Sidiq: NASA Yupitér Hemrahi «Yawropa» (Europa) diki Suning Ichini Tekshüridu

NASA Yupitér Hemrahi «Yawropa» (Europa) diki Suning Ichini Tekshüridu

NASA yéqin kelgüside Yupitérning hemrahi «Yawropa» (Europa) ning üstige bir tekshürüsh mashinisi chiqirip, shu arqiliq Yawropadiki suning ichini tekshürüp, yéngi hayatliq izdeydu.

Bu tekshürüsh mashinisi In’glizche «Buoyant Rover for Under-Ice Exploration» dep atilidighan bolup, u qisqartilip «BRUIE» dep yézilidu. Bu mashina yéqinda Los Anzhélistiki bir su janliqliri öyide sinaq qilindi. Mezkur mashinining sistéma we téxnologoyisining sinaqlirini NASA merkizi J P L diki mutexessisler élip bériwatidu.

1-resim: Yawropadiki suning ichini tekshürüdighan mashinining su janliqliri öyidiki bir körünishi.

Mezkur mashinining uzunluqi 7.3 métir bolup, u Yawropadiki suning ichige kirip, suning ichini resimlerge élip, tartqan resimlerni we yiqqan bashqa ilim uchurlirini yer yüzige mangdurup béridu. Shu arqiliq yéngi hayatliq shekillirining alametlirini izdeydu. Bu mashina suda leyliyeleydu. Shundaqla özidiki chaqlargha tayinip muzning astinqi yüzide mangalaydu. Alimlar bu qétimqi tekshürüsh arqiliq Yawropadiki muz bilen uning astidiki sularni öz-ara tutashturup turidighan rayonlarning ehwali heqqide qimmetlik uchurlargha ige bolushni ümid qiliwatidu [1]. Alimlarning qarishiche, oxshash téxnologiyidin paydilinip, tashqiy alem boshluqidiki muz jisimlirini tekshürüp, hayatliqlarning alametliri we janliqlar yashiyalaydighan tashqiy planétilarnimu bayqighili bolidu. Shundaqla mushu mashina bilen Shimaliy qutup we Antraktikinimu tekshürgili bolidu [2].

Mezkur mashina déngiz astining 200 métirghiche bolghan chongqur rayonlirida tekshürüsh élip baralaydu.

Eger Yawropada hayatliq mewjut bolush éhtimalliqi jezimleshtürülse, kéyinki basquchta yéngi tiptiki mashinidin birini Yawropagha qondurup, andin uning üstidiki 20 – 30 kilométir qélinliqtiki muzdin tiship ötüp, muzning astidiki suni tekshürüshke toghra kélidu. Hazir ashundaq meqset üchün ishletkili bolidighan tekshürüsh mashinisimu sinaq qiliniwatidu (2-resim).

2-resim: Yawropadiki suning ichini tekshürüdighan mashinining su janliqliri öyidiki yene bir körünishi.

3-resim: Hazir Amérikining Alaska shtatida sinaq qiliniwatqan tekshürüsh mashinisining bir körünishi. Bu mashina lazér nuri bilen qélin muzlarni tiship öteleydu.

NASA mezkur projékt üchün 2016-yiligha 30 milyon dollar pul ajiratqan bolsimu, töwendiki 2 parche paydilinish matériyalida bu mashinining qachan Yawropagha chiqirilidighanliqi, we qanchilik chongqurluqta tekshürüsh élip baridighanliqi heqqide héch qandaq uchur bérilmeptu. Shundaqla töwendiki 1-menbede bu mashinining uzunluqi 7.3 métir, déyilgen bolup, 2-menbede bolsa bu mashina 7.3 métir chongqurluqtiki suning astida sinaq qiliniwatidu, déyiliptu. Yuqiridiki 1-resimdin qarighanda, bu mashinining uzunluqi 7.3 métir kelmeydighandek qilidu.

[2] Nasa reveals the underwater alien hunting robot set to go to Europa to look for life

Bu maqalini héchkimdin sorimay, menbesini bergen asasta bashqa her qandaq torgha chiqarsingiz, yaki élkitabqa oxshash bashqa her qandaq shekilde ishletsingiz boluwéridu. Bu maqale barliq uyghurlargha mensup.